هێمن هەورامی: چاڤەڕێ دكەین لژنەیا ڤەكۆلینا حوكمەتا ئیراقێ راستییان بۆ رایا گشتی بەلاڤ بكەت
د. هێمن هەورامی، بەرپرسێ پشكا رێكخستنا پارتی دیموكراتی كوردستان، پێشوازی ل ستین بیرتنەر، قۆنسلێ گشتیێ ئەمریكا ل هەرێما كوردستانێ و شاندێ د گەلدا كر و د دیدارەكێدا قۆنسلێ ئەمریكا هەلوەستێ وەلاتێ خوە دوپاتكر كو پشتەڤانەكا ب هێزە بۆ هەرێما كوردستانێ و بیر و بۆچوون ژی ل دۆر رەوشا سیاسی و دووماهی گوهۆڕینێن ل سەر ئاستێ دەڤەرێ و ئیراقێ لێكگۆهارتن.
هەر د وێ دیدارێدا، قۆنسلێ گشتیێ ئەمریكا ل هەرێما كوردستانێ، هەلوەستێ وەلاتێ خوە دوپاتكر بۆ پرۆتەستوكرنا هێرشێن درۆنی یێن ڤێ دووماهیێ و ئاماژەكر كر ئەمریكا پشتەڤانەكا ب هێزە بۆ هەرێما كوردستانێ. هەروەسا بەرنامەیێن ئەمریكا د هاریكارییا هەرێما كوردستانێدا ژ روویێ چاكسازیێن وەزارەتا كاروبارێن پێشمەرگەیڤەو سیكتەرێن ئابۆری و خزمەتگوزاریێن دی ل هەرێما كوردستانێ بەرچاڤكر. دیسان سیاسەتا وەلاتێ خوە ل دۆر رەوشا سیاسی و ئەمنییا ئیراقێ شرۆڤەكر.
د. هێمن هەورامی، ب هەلكەفتا ب دووماهی هاتنا دەمێ كارێ وی وەكو قۆنسل ل هەرێما كوردستانێ، ب ناڤێ پارتی دیموكراتی كوردستان سوپاسی و دەستخوەشی و رێز بۆ كارێن قۆنسلێ ئەمریكا د دەمێ ئێك سالا كاركرنا وی ل هەولێرێ، پێشكێشكر و هیڤییا سەركەفتنێ د كارێ وی یێ نوو دا بۆ خواست.
هەورامی، رەوشا سیاسییا ناڤخوەیا كوردستانێ و دووماهی پێنگاڤێن پرۆسەیا پێكئینانا كابینەیا دەهێ و پێشڤەچوونا دانوستاندنان ل گەل برایێن ئێكەتیێ بۆ شرۆڤەكر.
بەرپرسێ پشكا رێكخستنا پارتی، سەرەرای سوپاسییا هەلوەستێ ئەمریكا د پرۆتەستۆكرنا هێرشێن درۆنی، ب رۆهنی ئەو چەندە بەرچاڤكر كو دەزگەهێن ئەمنی یێن هەرێما كوردستانێ هەموو هووركاریێن ئەنجامدەرێن هێرشێن درۆنی و ئالیێن ل پشت وان هێرشان ل دەف هەیە و گوت» چاڤەڕێینە ئەو لژنەیا ڤەكۆلینا حوكمەتا ئیراقێ راستییان بۆ رایا گشتی بەلاڤ بكەت و حوكمەتا ئیراقێ ئالیێ ئەنجامدەۆر ئاشكرا بكەت و بگەهینیتە سزایێ قانوونی».
ل تەوەرەكێ دی یێ كۆمبوونێ ل دۆر هەلبژارتنێن جڤاتا نوونەرێن ئیراقێ ل مەها 11 یا ئەڤسالە، روانگە و بەرهەڤیێن ئالییان هاتنە گەنگەشەكرن.
