هەبوونا ژەهرێ د گۆشتێ مریشكێن كوردستانێ دا دهێتە رەتكرن
دهۆك، دلۆڤان ئاكرەیی:
رێڤەبەرێ گشتی یێ سامانێ ئاژەلی ل هەرێما كوردستانێ دیاركر، ئەو گۆتگۆتكێن دەربارەی هەبوونا ژەهرێ د گۆشتێ مریشكێن پرۆژەیێن ناڤخۆ دا دهێنە بەلاڤكرن چو راستی بۆ نینن و دبێژیت: بەرهەمێ كوردستانێ ل سەر ئاستێ دەڤەرێ ئێكە ژ باشترین و سلامەتترین بەرهەمان و پشكنینێن ئیماراتی ڤێ راستیێ دیار دكەن.
رابەر مەحەمەد، رێڤەبەرێ گشتیێ سامانێ ئاژەلی و ڤێتێرنەری ل هەرێما كوردستانێ بۆ رۆژنامەیا ئەڤرۆ گۆت: «شاندەكێ وەلاتێ ئیماراتێ ب مەرەما پشكنینێ، 100 كیلۆگرام ژ گۆشتێ مریشكێن پرۆژەیێن خودانكرنا پەلەوەران و هێكان ل گەل خۆ برینە تاقیگەهێن وەلاتێ خۆ و ئەنجامێن پشكنینێ سەلماندینە، كو كوردستان خودان باشترین جۆرێ مریشكێ یە د ناڤ هەمی وەلاتێن دەڤەرێ دا».
ل دویڤ گۆتنێن رابەر مەحەمەد، هەرێما كوردستانێ نە ب تنێ پێدڤیێن ناڤخۆ دابین دكەت، بەلكو 30%ێ بەرهەمێ مریشكێن خۆ بۆ باژێڕێن دی یێن ئیراقێ دهنێریت، ل دووماهیێ داخواز ژ وەلاتییان كر كو ب هشیاری سەرەدەریێ ل گەل ڤان نووچەیێن بێ بنەما بكەن و باوەری ب بەرهەمێ ناڤخۆ هەبیت.
