هەبوونەكا ب هێز دۆسـتان پـەیدا دكـەت
ئيحسان ئـامێدی
ئەم كورد مللەتەكێ ئاشتیخوازین مە دڤێت د وەلاتێ خۆ دا ب ئارامی بژین، بەلێ چ بكەین هەر ژ كەڤندا قەدەرا مە هۆ بوویە دەردورێن مە بەلا خۆ ژ مە ڤەناكەن، هەر جار دكەڤینە بەر حنگا ئێك یان دو یان هەر سێیان پێكڤە!.
فرس و تورك و عەرەب ژكەڤندا ب شەڕ و پتكدادانا بوون و پتریا وان شەڕان ژی ل سەر خاكا كوردستانێ بوون، هەمی وەكو كوردان بوونە مسلمان، و تیر و رم و شیرێن خۆ خۆشتر لێكرن بۆ شەڕی و كوشتنێ و وێرانكرنێ.
بەری موسلمانەتیێ شەڕ و كوشتن وێرانكرن ب مێرانی دزانی!، پشتی مسلمانەتیێ هەر شەڕ و كوشتن وێرانكرن بوو ب قەهرەمانی نیشا دا!، كرنە دەولەتێن هەڤچەرخ هەر شەڕ و كوشتن و وێرانكرنێ دكەن و ب هێز دزانن!، باشە ما ئەڤ جڤاكە تێر نەبوون ژ كوشتنێ و خوینرژتنێ!؟ نێ بەری هین یێ دی بكوژن، یێن وە یێن دهێن كوشتن! وە دل ب خەلكی ڤە نینە بلا وە دل ب یێن خۆ ڤە بیت!.
مللەتێن وە تێرا وەهەیە، وەلاتێن وە ژی حەفت تێری وە هەیە، دێ بۆ خۆ د وەلاتێن خۆ دا ب ئارامی بژین و بهێلن بلا كورد ژی ب ئارامی د وەلاتێ خۆدا بژین.
كوردان خزمەتا وە هەمیان كریە، هەژی و پێدڤییە هین پاداشت بكەن و رێزێ لێ بگرن، ئەوێ نەكەن!، بەلا خۆ ژێ ڤەكەن دا بۆ خۆ بژین.
داگیركەر هەر یێ ل سەر دەودوا خۆ، شەڕ، داگیركرن، كوشتن، وێرانكرن، تالانكرن!،
ناهێلن ببینە دەولەت، كونفیدرالیەتێ نا پەژرینن، فیدرالیەتێ قەبوول ناكەن، ئۆتونومی نادەن، نەناڤەندیێ ناكەن و برایەتی ژی نەڤێت پا چ!؟.
مخابن كورد ل گەل ڤان نەتەوەیێن هەڤئاین و هۆسا ب دڕندانە ب سەری دئینن!.
كوردان هەمی رێكێن ئاشتیێ گرتینە بەر، بەس دا ب ئازادی و سەرفرازی د وەلاتێ خۆ دا بژین لێ ئەو ب چیان درازی نینن.
ڤێت بزانن كورد ژی یێ دهەین و مافدارن و ئاشتیخوازن و برایەتیێ دخوازن، پێدڤیە سەرەدەریا ئەرینی دگەلدا بكەن.
ئەم و هوین ویێن دی، هەر ژ هەبوونێ و هەروهەر پیكڤە هەینە دا رێزێ ل هەڤبگرن و ب ئاشتیانە پێكڤە بژین. خۆدێ مرۆڤ ب ئەقلی بەخشی یە و ژ هەمی ژیاندارێن دی بلندتر كریە و كریە مەزنێ هەمی ژینداران دا ب ئەقلی هزربكەت و كاربكەت و باشیی و خرابیێ ژێكجودا كەت و سەرەدەریێ بكەت.
نزانم بۆچی دەستهەلاتدارین دەولەتین داگیركەرێن كوردستانێ ب ژیری و ئەقلی سەرەدەریێ ل گەل كوردان ناكەن!؟، ما حەیف و مخابنی نینە ل ڤی سەردەمێ جیهانیبوونێ و ژیرێ دەستكرد هشتا ئینكارا هەبوونا نەتەوەیا كوردان بهێتەكرن و ل سەرا ناسنامێ بهێنە كوشتن و ژناڤبرن!.
ڤان دەستودارێن سەخت و دژوار، هەمی هەڤئاینێن كوردان ژ دەولەتێن هەرێمایەتی یێن دبنە دوژمنێن كوردان و ژناڤ دبەن. كورد ژی ژ نەچاریا خۆ یێن هەوارا خۆ د سەر وان دەولەت و رێكخراوێن موسلمانان ڕا دگەهینە دەولەتێن ئایینێن دی!، ما شەرم و فهێتی نینە ژ پێنجی و حەفت دەولەتی موسلمانان؛ ئیك دەولەتا بتنێ ژی نەبوو سەرانین وان وژدانا وان بهەژیێت و بێژن نە بۆ كوشتنا كوردان؟!، و ئیدانەیا دەستدریژێ ل سەر كوردان بكەن و پشتەڤانیا مافێن سروشتی یێن خەلكێ كوردستانی بكەن!؟
دیارە ل ڤێ دەڤەرێ هێشتا قانوونا دارستانێ یە!.
قانوونا دارستانێ بۆ گیانەوەرێن بێ ژیر و هۆشە، بەلێ ل ڤێ دەڤەرێ ئەوین خۆ داننن هۆش و ژیر و خۆدان پەیامێن ئاسمانی ژی هەر رەفتارێن قانوونا دارستانێ بكاردئینن، یێ ب هێز یێ لاواز دخۆت!. دیارە راستا گۆتی قوەت علەتی دبڕیت! و دبێژن تە هێز هەبیت و بزانی یاریێ بكەی دێ یا تە دڤێت ب دەستڤەئینی!.
ئەو راستی بیت كوردان گەلەك هۆكارێن هێزێ پەیداكرینە، هەمی رێكخستنێن سیاسی و شۆرش و سەرهلدانێن كوردان هۆكارێن هێزی بوونە؛ لێ كەفتینە بەر پیلان و شەڕێن دوژمنان.
هەرێما كوردستانێ ب هۆكارێن هێزێ دامەزراندی یە و دهێتە پاراستن، هەروەكو رۆژئاڤا ژی ب هێزێ چێكریە و بەرەڤانی لێ دهێتەكرن.
سەرۆك بازانی خەمخۆرێ دەردوژانێن مللەتی و خۆدانێ دۆزا وێ یا رەوا، پشتی سەربۆرەكا درێژ یاخەباتێ و دیبلۆماسیەتێ د دیدارەكێ دا د فەرمۆت: تو هەبی خەلكێ هەی و تو نە بی كەس نینە.
سەرۆك بارزانی د پەرتووكا خۆ دا بۆ مێژوو دبێژیت:
ئامۆژگاریێن من بۆ هەر تاكەكێ كورد، هەمی سیاسیێن كورد، ل بابەتی مافێن رەوایێن گەلێ مە دا ئەڤەیە.. كو چ جاران پشتا خۆ ب كەسێ گەرم نەكەن. جیهان جیهانا بەرژەوەندیایە، ئەگەر بەرژەوەندیێن وان ل گەل كوردان بگونجن ئەڤە ئەو دێ بنە دۆست و ئەگەر بەرژەوەندیێن وان نەگونجن دێ پشتا خۆ دەن و وە نانیاسن!.
تنێ پشتا خۆ ب خۆدێ و پشت ب خۆ ببەستن، ئەگەر پێشمەرگەیێ خۆ مە هەبیت و هێزا خۆ مە هەبیت كوردستان دێ شێت خۆ پارێزیت، ئەگەر بیهێزبووین ناهێینە پاراستن و دی مە ژناڤبەن.
هەروەسا سەرۆك بارزانی د بەڕگێ چارێ یێ پەرتووكا بارزانی و بزوتنەوەی رزگاریخوازی كورد دا د فەرمۆد: هەر كەس و لایەنەك ل دویڤ بەرژەوەندێن خۆدایە و كەس ئامادە نینە ژبەر خاترا پرانسیبێن مافێن مرۆڤی چ بۆ كوردان بكەت. هەر تشتەكی پەیوەندی ب گەلێ كوردستانێ و شیانێن مللەتێ وی ب خۆ ڤە هەیە، ئاست و شێوەیێ هەڤكاریێ و هاریكاریێن دەرڤە گرێدایە ب وێ ڤەیە كا تو چەند دشێی خۆ بسەلمینی، چەند بهێز و خورت بی جیهانا دەرڤە گرنگیێ و پویتە یا زێدەتر ب تە ددەت، بەلێ ئەگەر دۆستینی ژی هەبیت و پێكڤە كار ژی كربیت و ئەگەر لاوازی بی و خۆ نەسەلمینی ل دوماهیێ گرنگیێ و پویتەی بتە نادەن، ب واتایەكا دی ل جیهانا سیاسەتێ دا دۆستایەتی و دوژمناتی بەردەوام نینە، بەلێ بەرژەوەندی بەردەوام هەیە، ل بەر هندی و پێدڤییە بەردەوام ئەڤ راستیە ل پێشچاڤ بیت، پێدڤیە خۆ ب هێز بكەین و هەبین بۆ هندێ خەلكێ دیتر ئامادەبن دۆستینیێ د گەل مەدا بكەن. ئانكو دڤێت ئەم هەبین و بهێز بین و بشیین خۆ بپارێزین دا خەلكی دی سەرەدەریێ ل گەل مە بكەت و مە بپەژرینیت.
ل ڤی دەستودارێ مللەتێ مە ل رۆژئاڤا كەفتیێ، ئیرادەكا كوردستانی هەیە بۆ پشتەڤانیكرنێ و خوراگرتنێ و پاراستنێ و هۆكارێن هێزێ یێن رۆلێ خۆ دگێرن بۆ راگرتنا هێرشێن لەشكری و چارەسەریێن ئاشتیانە، ژ وان هۆكارێن هێزێ، هێزا كەساتیا سەرۆك بارزانی و جێگرێن وی و پەیوەندیێن وان یێن سیاسی و هەرێمایەتی و نێڤدەولەتی، كو هەر زوی ب هەمی شیانین خۆ پەیوەندی ب سەرۆك و بریار ب دەستێن لایەنێن پەیوەندیدار و زلهێزێن جیهانێ كرن و رۆلەكێ كاڕا گێرا كو مایتێكرن چێببن بۆ راگرتنا هێرشا لەشكری ل سەر رۆژئاڤا، هەروەسا هێزا هەرێما كوردستانێ یا لەشكری و دیبلۆماسی و ئابۆری و مەدیایی و جەماوەری و هێزا بزاڤین لایەنێن سیاسیێن كوردستانی و هێزا دۆستێن كوردان ل وەلاتێن بیانی و هێزا جەماوەریا گەلێ كوردستانێ و خۆنیشادانێن پشتەڤانیێ ل رۆژئاڤا ل سەرانسەری جیهانێ و گڤاشتنێن وان ل سەر ناڤەندێن نێڤدەولەتی، هەروەكو رۆلێ هێزا مەدیایا كوردستانی و نیشادانا وێنەیێن بالكێشێن دەردەسەریێن كوردستانێ و دۆزا رەوایا كوردستانێ و چالاكیێن جۆراوجۆرێن كوردان، ئەڤە هەمی بۆ پشتگیری و پاراستنا وێ هەبوونا ل رۆژاڤا بەرگریێ دكەت و هێزا بەرخۆدانا شەڕڤانێن هەسەدێ و خۆراگریا مللەتی، و ئەڤێ بزاڤا هەمەجۆر یا مەزن، پیلانەكا مەزن یا ل دژی كوردان ژناڤبر، و رەوش بەر ب بیركرنێ ل سەرەدەریەكا دیتر ڤە بریە، ب هیڤینە بگەهینە كنارێن ئارام و ل سەر دەستهەلاتدارێن كوردی ل رۆژئاڤایێ یە پرۆژەكێ كوردیێ رۆژئاڤا بەرهەڤكەن و سیاسەتێ پێبكەن دا ئەڤ دەرفەتە نەبیتە گۆری دەستێوەردانێن دەرەكی.
دیارە كوردان هۆكارێن هێزێ پەیداكرینە و دشێن ب باشی بكاربینن. بەلێ هێشتا گەف لسەر كورد و كوردستانێ هەنە و ل ناڤ ڤان هۆڤان دا پێدڤییە خۆ ب هێزتر بكەین ب هەڤگرتنێ و پتر خۆ رێكبێخین و دا بشێن هەنبەری دوژمنان راوەستین و هەبوونا خۆ بسەپینین و بپارێزین.
