هەبوو.. نەبوو..
هۆزان عسمەت مزووری
هەبوون و نەبوون هەبوون، هەبوون و نە بوون دو برادەرێن ئێك یێن خۆشتڤی بوون، هەر چەنده حەز ژ ئێك دو دكرن، لێ هەر ژ دەستپێكێ، هەبوونێ حەسیدی ب نەبوونێ دبر، هەر چەندە ژی هەمی دەمان هەبوون د ناڤ نە بوونێ دا بوو و نەبوون ژی هەمی دەمان دناڤ هەبوونێ دا بوو.. رۆژەكئ هەبوون و نەبوون دكەڤنە بەرانبەر ئێك و ژ نشكەكێ ڤە
نەبوون دكەڤیتە دئاڤێ دا و نقۆم دبیت و هەوار و گازی دكەت: هەبوون .. هەبوون، من دەربئێخە تو یا د بینی ئەز یا كەتیمە د ناڤ ئاڤێ دا نێزیكە دێ خەندقم، هەبوونێ ژی هاریكاریا نەبوونێ نە كر و ژ پشت كوهڤە هاڤێت! ب تنێ تەماشای رۆندكێن نەبوونێ ئەوێن مینا تاڤییێن بارانێ دبارین و دبوونە جۆیێن ئاڤێ ب رووكێن وێدا دهاتنە خوار دكر. نەبوونێ ژی گیانێ خوە ژ دەست دا و چوو بەر دلۆڤانیا خودێ و بێی هیچ سامانەك و مالێ دونیایێ ب خوەڕا ببەت،
هەبوون ژی ل دووماهیێ بوو هەبوونەكا بێ نەبوون، بتنێ و بێ خودی ما ڤە:
ئەڤە چ ژیانە؟!
ئەڤە چ بێ دلی و دل ڕەقییە تو بەرانبەری خۆ بكار دئینی؟!
یان ئەز یا شاشم!؟ دبیت دل د ڕكەها سینگێ تە دا نەبیت و تو بێ دل بژی و دەرۆنێ تە ژ هەستان یێ ڤالا بیت، یان تە ژی وەكی هەر كەسەكێ گونەهبارەك د دلێ خۆدا هەیە و تو وەسا هزر دكەی وی گونەهباری هەمی هەستێن تە یێن دزین و بۆ خوە برین و تو ژ هەستان یا ڤالا كری!
سەردا نەچە! رۆندكان نەبارینە ژ بەر نەبوونێ، كەس تا دووماهیا ژیانێ نامینیت و هەر ئێك ل دووماهیا وێ قۆناغا بۆ وی هاتییە دەسنیشانكرن دێ مینیت و پاشی دێ كەڤیت و بەرزە بیت، چ هەبوون بیت، یان ژی نەبوون.
