هەتا دووماهیا ئەڤسالە دێ قووناغا ئاشتیێ ب دووماهی هێت
دەولەت باخچەلی سەرۆکێ پارتا بزاڤا نەتەوەپەرست یا تورکیا ل گەل چەند رۆژنامەڤانێن ناڤدار یێن تورکیا کۆمبوو و بەحسێ قووناغا ئاشتیێ کر و راگەهاند، سۆتنا چەکان ژ ئالیێ گرۆپەکێ پەکەکێ ڤە کارەک گەلەک باش بوو، ئانکو دەمێ چەک هاتنە سۆتن جارەکا دی چەک ناهێنە بکارئینان، ژ بەر ڤێ یەکێ ژی پەیامەک گرنگ هاتە دان.
سەرۆکێ پارتا بزاڤا نەتەوەپەرست یا تورکیا ئەو یەک ژی دیار کر، هەتا نها قووناغا ئاشتیێ ب رەنگەکێ باش بەردەوام دکەت و پێکئینانا کۆمسیۆنێ ل پەرلەمانێ تورکیا ژی کارەک گەلەک مەزن و دیرۆکی بوو، دڤێت کۆمسیۆن بلەز کارێن خوە ب دووماهی بینیت.
باخچەلی ئەو یەک ژی نەڤەشارت هەتا دووماهیێ ئەڤسالە دێ قووناغا ئاشتیێ ل تورکیا ب دووماهی هێت و دێ گوهۆڕینێن گەلەک مەزن ژی روو دەن و ئەو یەک د بەرژەوەندیا هەموو خەلکێ تورکیا دایە.
