هەتا زمانێ کوردی زێدەبووی، من 28 کومبوون ل گەل گۆگل ئەنجامداینە
نەوزاد هلۆری:
بوکان جاف ئێک ژ گەنجێن شارەزا و زیرەک یێن وارێ تەکنولوژیایێ یە، چەندین کار و بەرنامەیێن گرنگ بۆ خزمەتا کوردستانێ کرینە ژ گرینگترین ژ وان ژی زێدەکرن زمانێ کوردی بۆ سەر گۆگلی.
بوکان جاف، دامەزرینەرێ کوما گوگل کرادسوس ل عیراق و کوردستانێ بو رۆژناما ئەڤرۆ گۆت، هەر ژ زارۆکینی من حەزا کارێن تەکنولوژیایێ هەبویە، خەون و هیڤیا من بو کو زمانێ کوردی ل گوگل و چەند وێبسایتێن دن یێن جیهانی زێدە بکەم، سوپاس بۆ خودێ ئەز ب خەون و هیڤیا خوە گەهشتم و زمانێ کوردی ب زاراڤێ سورانی زێدەکر، بێگومان زێدەبونا زمانێ کوردی پروسەییەکا زێدە زەحمەت و ئالوزە ژبەرکو داتا و پێزانین سەبارەت زمانێ کوردی زۆر کێمن و ل بەر دەست نەبون، وەکی ئاریشا کیبوردێ کوردی، کێمبوونا ژێدەرێن کوردی ل ئەنترنێتێ، نەبونا پشتەڤانیێ کو دەنگێ مە بگەهیتە گوگل، دیسان نەبونا زمانێ ستاندەر و نەبونا زمانێ کوردی ل ئەپ و وێبسایتێن جیهانی و چەندین ئاریشەیێن دی، بەلێ سوپاس بۆ خودێ پشتی چارەسەرکرنا ڤان ئاریشان ژ نوو گوگل سوزدا کو پشتەڤانیا مە بکەت.
زێدەتر گوت، کونسولخانا ئەمریکا ل هەرێما کوردستانێ پشتەڤانیا خوە بومە دەربری، پشتی حەفت سال و ئەنجامدانا 28 کومبونا ل گەل گۆگلی، ل دوماهیێ شیاین ملیونەک و 300 هزار داتایان سەبارەت زمانێ کوردی بکەینە ناڤ گوگلی، بڤی رەنگی زمانێ کوردی زێدەبوو، کو ئەڤ یەک ژی کار و پێنگاڤەکا هەری گرنگە، ژبەرکو هەموو تەخ و چینێن جڤاکی و قوتابیێن زانکو و پەیمانگەهـ و ناڤەندێن خواندنێ و نوژدار و زمانزان و دامەزراوەیێن حوکمەتێ دشێن مفایەکێ هەری گرنگ ژێ ببینن، ئەگەرا سەرەکی یا رازیبونا گوگل ژی دزڤرین بۆ هندێ کو گەلێ کوردستانێ زور قوربانی و جینوساید و کێمیا باران ب سەری هاتینە، بو نمونە کێمیا بارانا هەلەبچە زور کارتێکرن ل وان کر.
ناڤبری دیارکر ژی کو ژبلی زێدەکرنا زمانێ کوردی ل گوگل، هەڤدەم زمانێ کوردی ل وێبسایتا کراودین، کراودسۆرس ،ترادوکا و چەندین وێبسایتێن دن ژی زێدەکرینە و گوت ژی، مخابن کوردان وەکو پێدڤی مفا ژ تەکنولوژیایێ وەرنەگرتیە، ددەمەکێ دا کو هەموو تشت ل بەردەستن بۆ مفا وەرگرتنێ، دهەمبەر چێکرنا ڤان کارا من ژ رووی مادی ئێک دینار ژی وەرنەگرتیە، بەروڤاژی من مەزاختن ژی کریە، بەلێ خەلکەکێ زور دەستخوشی ل من کریە.
بوکان ل سالا 1991ێ ژ دایکبویە و دەرچویێ زانکویا سلێمانیێ و کولیژا پەروەردا ئینگلیزی یە، ل هەلەبچە دژیت.
