هەتا نها بۆ چارەسەرکرنا پرسا کوردی ل تورکیا چو نەهاتیە کرن
ئاکپارتی و پارتا بزاڤا نەتەوەپەرست راپۆرتێن خوە بۆ قووناغا ئاشتیێ رادەستی کۆمسیۆنێ کرن و د راپۆرتێن وان دا بەحسێ چارەسەرکرنا پرسا کوردی و مافێن گەلێ کورد نەهاتیە کرن و رەوشەنبیرێن کورد ل تورکیا ژی دیار دکەن، رەوشەکا گوماناوی ل تورکیا هەیە.
محەمەد داغلی مامۆستایێ زانکۆیێ ل باکورێ کوردستانێ بۆ ئەڤرۆ دیار کر، پشتی سالەکێ ژ دەستپێکرنا قووناغا ئاشتیێ ل تورکیا هەتا نها ب کریاری چو نەهاتیە کرن، یا راست ئارمانجا دەولەتا تورکیا ژناڤبرنا دەستکەفتیێن گەلێ کوردە ل رۆژئاڤایێ کوردستانێ، ئاکپارتیێ و پارتا بزاڤا نەتەوەپەرست راپۆرتێن خوە ئاراستەی کۆمسیۆنێ کرینە و تێدا بەحسێ مافێن رەوا یێن گەلێ کوردستانێ نەهاتینە کرن، هێشتا ژی هەلوەستێ هەر دو پارتیان وەکو بەرێ یە، ئەو دبێژن بلا کورد خوە رادەست بکەن و داخوازا چو مافەکێ ژی نەکەن و گۆت: (ئەم وەکو کوردێن باکورێ کوردستانێ ژ رەوشا نها دلگرانین، چونکی دەولەتا تورکیا بەرهەڤ نینە چو مافەکێ بدەتە کوردان، هەتا دبێژن پەروەردەیا ب زمانێ کوردی ژی دێ بیتە ئەگەرێ پارچەبوونا تورکیا، پا وی دەمی دڤێت ئەم ڤێ پرسیارێ بکەین کا ئارمانجا هەوە ژ دەستپێکرنا قووناغا ئاشتیێ چیە؟ کورد چاوا دێ باوەریا خوە ب دەولەتا تورکیا ئینن).
حەسەن ئامەدی رەوشەنبیرێ خەلکێ باتمانێ ژی دیار کر، گەلەک جاران بەرپرسێن دەولەتێ و یێن ئاکپارتیێ هندەک داخویانیان ددەن کو وەسا دکەت باوەریا مرۆڤی ب قووناغا ئاشتیێ نەمینیت، چونکی پەکەکێ و ئۆجەلانی گەلەک تشت کرن، پەکەکێ ب فەرمی خوە هەلوەشاند، چەکێ خوە سۆتن و هێزێن خوە ژ گەلەک دەڤەران ڤەکێشان، لێ هەتا نها دەولەتا تورکیا ب کریاری چو نەکریە، بەری نها دگۆتن دێ دەمیرتاش و گەلەک گرتیێن سیاسی هێنە ئازاد کرن، لێ ئەو ژی نەهاتە کرن، نها ژی راپۆرتێن هەر دو پارتیان رادەستی کۆمسیۆنێ کری تێدا بەحسێ مافێن گەلێ کورد نەهاتیە کرن، ئەو یەک ژی نیشا ددەت نیەتا دەولەتا تورکیا ل هەمبەر گەلێ کورد ل تورکیا یا باش نینە و گۆت: (هەر ژ دەستپێکێ ژی من وەسا باوەر دکر کو ئارمانجا دەولەتا تورکیا نەهێلانا دەستکەفتیێن گەلێ مە یە ل سووریێ، نها ژی هەر رۆژ دبێژن دڤێت هەسەدە دەست ژ چەکی بەردەت، دەولەتا سووریێ بخوە داخوازەک وەسا ژ کوردان ناکەت، هاکان فیدان وەکو وەزیرێ دەرڤە یێ سووریێ کار دکەت و هەر رۆژ گەفان ل کوردان دکەت، باوەریا کوردان ل تورکیا ب قووناغا ئاشتیێ گەلەک کێم بوویە، هەکە وەسا بیت ئەز باوەر ناکەم چو تشتەک بهێتە چارەسەرکرن).
ل ئالیێ دی حەسەن جەمال نڤیسەرێ ناڤدار یێ تورک ژی دوهی راگەهاند، دڤێت ئاکپارتی و مەهەپە باش بزانن هەکە نیەتا وان ئەو بیت کو دێ کوردان مژوول کەن دا بزانن کا دێ رەوش بەر ب کیڤە چیت ئەو یەک دێ ئەنجامێن خوە یێن گەلەک خراب بۆ تورکیا هەبن، چونکی کورد ئەڤرۆکە ل سووریێ بهێزن، ئەمریکا و وەلاتێن دی یێن زلهێز ژی دەست ژ کوردان بەرنادەن، ئەو باش دزانن هەکە کورد ل سووریێ لاواز ببن و ل هەمبەر دا شام بهێز کەڤیت دێ تورکیا ژی بیتە ئاریشەیەکا نوو بۆ وان، ئانکو ب کورتی ئەمریکا، بریتانیا، ئەلمانیا و فرەنسا سووریێ بۆ تورکیا ناهێلن و گرنگە تورکیا ژی چو حسابێن شاش نەکەت، دڤێت ل پەرلەمانێ تورکیا کار بۆ چارەسەرکرنا پرسا کوردی بهێتە کرن و گرنگە ئاکپارتی و مەهەپە خوەدان پرۆژە بن.
ل هەمبەر راپۆرتێن کو ئاکپارتی و مەهەپێ رادەستی کۆمسیۆنێ کرینە ژی دوهی تونجەر باکرهان هەڤسەرۆکێ دەم پارتیێ دیار کر، هەر دو پارتێن کو هەر رۆژ بەحسێ ئاشتیێ دکەن ب دەهان بەرپەر راپۆرت رادەستی کۆمسیۆنێ کرینە و تێدا بەحسێ کوردان و مافێن وان نەهاتیە کرن، ئەو یەک ژی نیشا ددەت هێشتا ژی نێرینا وان ل هەمبەر کوردان هەر نێرینا کەڤنە و مخابن ئەو یەک د خزمەتا چارەسەریێ دا نینە، ئاشتی دێ دەمەکێ ل تورکیا بجه هێت کو کورد ژی وەکو تورکان ببنە خوەدان هەمان ماف و گۆت: (نابیت بەحسێ ئاشتیێ و برایەتیێ بکەن، لێ د هەمان دەمی دا ل تورکیا وەلاتیێن تورک خوەدان هەموو ماف بن، لێ هەتا نها ژی دبێژن پەروەردەیا ب زمانێ کوردی دێ بیتە ئەگەرێ پارچەبوونا تورکیا، ئاشتی وەسا نابیت، کورد ژی ڤێ یەکێ قەبوول ناکەن).
باکرهان سەبارەت ب سیاسەتا تورکیا ل سووریێ ژی دیار کر، بۆچی هەر رۆژ ئەردۆغان و هاکان فیدان گەفان ل کوردێن سووریێ دکەن؟ کورد ل سووریێ گەف نینن بۆ تورکیا، کورد ل سووریێ داخوازا مافێن خوە یێن رەوا دکەن، لێ تورکیا ناهێلیت کورد و شام پێکڤە پرسێن هەی چارەسەر بکەن، هەر رۆژ گەفان ل کوردان دکەن و ل ئالیێ دی ناهێلن شام ژی گوهداریا کوردان بکەت، ئەو یەک ژی نیشا ددەت تورکیا نها رۆلەک خراب ل دەڤەرێ و ب تایبەتی ژی ل سووریێ دگێریت و هەکە تورکیا سیاسەتا خوە نەگوهۆڕیت دێ ئەنجامێن وێ سیاسەتێ گەلەک خراب بن، چونکی ئێدی سەردەمێ ئینکارکرنا کوردان نەمایە و بێی کوردان نە رەوشا سووریێ ئارام دبیت و نە ژی ئالۆزیێن ل تورکیا دێ چارەسەر بن.
هەروەسا گەلەک ژ نڤیسەر و چاڤدێرێن سیاسی یێ کورد ل تورکیا و ئورۆپا دلگرانیا خوە ل هەمبەر هەلوەستێ دەولەتا تورکیا ل دۆر پرسا کوردی دیار دکەن و داخواز دکەن دەولەتا تورکیا ب کریاری کار بۆ چارەسەرکرنا پرسا کوردی بکەت و گرنگە د زووترین دەم دا دەمیرتاش و هەڤالێن وی بهێنە ئازاد کرن.
