هەتا نوكە من پتری هزار ژمارەیان ژبەركرینە
شاكر ئەتروشی:
شیمال سلێڤانەیی، گەنجەكێ خەلكێ دهۆكێ یە، بۆ دەمێ پتر ژ (30) سالانە ئارەزوویا ژبەركرنا ژمارەیان هەیە و ب گۆتنا وی هەتا نوكە وی پتر ژ هزار ژمارەیێن مۆبایلان و ترۆمبێلان و تەرەددێن كەنالێن عەسمانی ژبەركرینە و ئێك ژوان ژمارەیان ئەڤە (30) سالن رۆژانە ل سەر دەڤێ وی دهێتە دوبارەكرن.
شیمالی بۆ رۆژنامەیا ئەڤرۆ گۆت: ل سالا (1992) بابێ من دكانەك ل نیڤا بازاڕی ڤەكر بوو، ل وی دەمی من ژی ل بەر دەستێ وی كاردكر و بیرا من دهێت مە ئامیرێ (سەحنێ/سەتەلایتێ) ب (30) هەتا (35) هزار دینارێن سویسری دفرۆتن و من هێدی هێدی خۆ فێرێ دانانا سەحنان كر و ئەز ژ كەسێن ئێكێ بووم پشتی رزگاركرنا ئیراقێ چوویمە باژێرێ مووسل من سەحن داناین و ل ڤێرە ئارەزوویا ژبەركرنا تەرەدددێن كەنالان بۆ من چێبوو، هەتا نوكە من هەموو ژمارەیێن وان ژبەرن، ژوانا تەرەددا ژمارە (1215) ئەڤە (30) سالن ل بیرا من و رۆژانە ئەز بۆ خەلكەكی دبێژم، د دووڤدا من ژمارەیێن ترۆمبێلێن كەسێن نیاس و مۆبایلان ژی ژبەركرن و هەر كەسەكێ بێژیتە من تەرەددا كەنالەكی یان ژمارەیا مۆبایلا فلان كەسی یان ژمارەیا مۆبایلا وی بدەن ئێكسەر ئەز بۆ دبێژم و ئەز خۆشیەكێ ژڤێ چەندێ دبینم.
