هەتا پرسا کوردی نەهێتە چارەسەرکرن دێ تورکیا هەر یا لاواز بیت
ب پشکداریا دەهان ڤەکۆلەر و زانایێن کورد و تورک ل باژێرێ ئامەدێ کۆمبوونەکا مەزن ل دۆر رەوشا نها یا تورکیا هاتە گێران و تێدا پشکداربوویان دیار کرن، هەتا پرسا کوردی ل تورکیا نەهێتە چارەسەرکرن دێ تورکیا هەردەم یا لاواز بیت.
ب پشکداریا دەهان ڤەکۆلەر، کەسانێن ئەکادیمی و پارێزەران ل ناڤەندا ڤەکۆلینان یا دیجلە ل باژێرێ ئامەدێ کۆمبوونەکا بەرفرەه هاتە گێران و تێدا پشکداربوویان دیار کرن، نها رۆژهەلاتا ناڤین د رەوشەکا گەلەک ئالۆز دایە و گوهۆڕینێن بلەز د رێ دانە و هەر گوهۆڕینەک ژی ل دەڤەرێ روو بدەت دێ کاریگەریا خوە ل سەر تورکیا ژی هەبیت، ژ بەر ڤێ یەکێ ژی گرنگە ئەوا نها ب ناڤێ قۆناغەکا نوو دەستپێکریە بەردەوام بیت هەتا پرسا کوردی ل تورکیا ب تەمامی دهێتە چارەسەرکرن.
د ڤێ دەربارێ دا مەسعود عەزیز ئۆغلۆ سەرۆکێ ناڤەندا ڤەکۆلینان یا دیجلە دیار کر، د سەد سالێن بۆری دا هەردەم پرسا کوردی ل تورکیا پرسەکا سەرەکی بوویە، لێ مخابن دەستهەلاتدارێن تورکیا هەردەم بزاڤ کرینە ب رێیا شەڕی و توندوتیژیێ و ژناڤبرنا ئیرادا گەلێ کورد ل گۆر خوە پرسا کوردی چارەسەر بکەن، لێ هەتا نها ژی پرسا کوردی نەهاتیە چارەسەرکرن و نها ژی پرسا کوردی پرسا هەری مەزن و سەرەکی یا تورکیا یە و مخابن هێشتا ژی چو بزاڤێن جدی بۆ چارەسەرکرنا پرسا کوردی نینن.
ناڤهاتی ئەو یەک ژی دیار کر، ب سالانە ل تورکیا زۆرداری ل گەلێ کورد دهێتە کرن، گوندێن کوردان هاتینە خراب کرن، ناهێلن کورد ب زمانێ خوە بئاخڤن و بنڤیسن، زۆرداریەکا مەزن ل گەلێ کورد هاتیە کرن و هەتا نها ژی دەولەتا تورکیا ب فەرمی هەبوونا گەلێ کورد ل تورکیا قەبوول نەکریە و گۆت: (جهێ داخێ یە هەتا نها ژی ل تورکیا زمانێ کوردی وەکو زمانەک نەنیاس دهێتە نیاسین، لێ هەبوونا زمانێن دی یێن بیانی ل تورکیا تشتەک ئاسایی یە، دەمێ بابەت دبیتە زمانێ کوردی دبێژن ئەو نە زمانە، د رەوشەکا وەسا دا چاوا هوون دشێن بەحسێ براتیا کورد و تورکان بکەن، هەکە براستی ژی دەستهەلاتا نها دڤێت پرسا کوردی چارەسەر بکەت، دڤێت بەری هەر تشتەکێ هەبوونا کوردان ل تورکیا ب فەرمی بهێتە قەبوول کرن و دووماهی ب وێ زۆرداریێ ژی بهێت کو سەد سالن ل گەلێ کورد دهێتە کرن).
د. وەهاب جوشکون زانایێ کورد ژی راگەهاند، چونکی ب سالانە تورکیا پرسا کوردی چارەسەر نەکریە ڤێ یەکێ کاریگەریا خوە ل هەموو بیاڤێن ژیانێ و سیاسەتێ ل تورکیا کریە، ژ بەر پرسا کوردی ئەڤرۆکە تورکیا د قەیرانەکا گەلەک مەزن دایە، ژ بەر شەڕی و ئالۆزیان پەیوەندیێن تورکیا ل گەل وەلاتێن ئێکەتیا تورکیا ئالۆزن و ب سالانە تورکیا دڤێت ببیتە ئەنداما ئێکەتیا ئۆرۆپا، لێ هەردەم پرسا کوردی وەکو پرسەکا مەزن بوویە ئاستەنگ ل هەمبەر ئەندامەتیا تورکیا، پارەکێ مەزن بۆ شەڕی و ئۆپەراسیۆنێن سەربازی دهێتە تەرخانکرن و نها تورکیا د قەیرانەکا گەلەک مەزن یا ئابووری دایە و گۆت: (هەکە براستی ژی دەستهەلاتێ بڤێت رەوشا تورکیا ژ هەموو ئالیەکێ ڤە باش بیت، ئاشتی و ئارامی ل تورکیا هەبیت و ژیانا خەلکی ژی خوەش ببیت دڤێت ئێدی پرسا کوردی چارەسەر بکەت، ب گۆتنا کورد و تورک برانە و تورکیا یا مە هەموویانە پرسا کوردی و پرسێن دی ناهێنە چارەسەرکرن، دڤێت دەولەتێ پرۆژەکێ بەرفرەه بۆ پرسا کوردی هەبیت و هەروەسا دڤێت ب پشکداریا هەموو هێزێن سیاسی ل پەرلەمانێ تورکیا کار بۆ چارەسەرکرنا پرسا کوردی بهێتە کرن).
ل ئالیێ دی گەلەک ژ پشکداربوویێن کۆمبوونێ ژی دیار کرن، دڤێت ئێدی دووماهی ب زۆرداریا ب سالان یا ل سەر گەلێ کورد ل تورکیا بهێت، هەکە دەستهەلاتا نها بڤێت پرسا کوردی چارەسەر بکەت دڤێت پرۆژێ خوە بۆ رایا گشتی ئاشکرا بکەت، پرسا کوردی ل پشت دەرگەهێن گرتی و ب نهێنی ناهێتە چارەسەرکرن، بەلکو دڤێت دەستهەلاتا نها خوەدان پرۆژە بیت و هەروەسا دڤێت هەموو پارتێن سیاسی و سازیێن جڤاکێ سڤیل ژی ببنە پشکەک ژ پرۆژێ چارەسەرکرنا پرسا کوردی، چونکی ئەزموونێن بەری نها سەلماندینە ژ بۆ ئاشتیێ و ئارامیێ دڤێت پرسا کوردی ل پەرلەمانێ تورکیا بهێتە چارەسەرکرن و ژ بۆ چارەسەرکرنا پرسا کوردی ل پەرلەمانێ تورکیا ژی دڤێت بەری هەر تشتەکێ دستوورێ نها بهێتە گوهۆڕین و د دستوورێ نوو دا هەبوونا گەلێ کورد ب فەرمی بهێتە قەبوول کرن، هەتا ئەو یەک نەهێتە کرن نە پرسا کوردی دێ هێتە چارەسەرکرن و نە ژی تورکیا دشێت خوە ژ رەوشا نها یا ئالۆز و قەیرانا ئابووری قورتال بکەت.
