هەتا کیشک ژی مۆبایلێ نەكە د دەستێ زارۆیێ خوە دا ؟
راپۆرتەكا نوو دیاركریە كو نە یا ساخلەمە ژ روویێن جەستەیی و دەروونی ڤە بۆ زارۆكێن د بن تەمەنێ 13 سالیێ دا موبایلا ئەنترنێت ل گەل هەی بكاربینن، هەروەسا نە یا دروستە بەری تەمەنێ 11 سالیێ موبایلا بێی ئەنترنێت ژی بكاربینن.
راپۆرتەكا نوی كو ژ لایێ ژمارەیەكا شارەزایان ڤە ل سەر راسپاردەیا ئیمانوێل ماكرۆن سەرۆكێ فرەنسا ڤە هاتیە بەرهەڤكرن، دیاركریە «نابیت رێك ب زارۆكان بهێتە دان موبایلا ئەنترنێت ل گەل هەی بكاربینن هەتا نەگەهنە تەمەنێ 13 سالیێ».
هەر ل گۆرەی وێ راپۆرتێ «دەمێ زارۆك د تەمەنێ دناڤبەرا 11 تا 13 سالیێ دا موبایلێ بكاردئینن، پێدڤییە ئەنترنێت د وێ موبایلێ دا نەبیت»، وەكی رۆژنامەیا گاردیان ئاماژەپێكری.
زێدە ژی كریە «ەەروەسا د تەمەنێ بەری 11 سالیێ دا، د بنی را نابیت زارۆكان موبایل هەبیت».
راپۆرت زێدە ژی دكەت «كەسێن هەتا 15 سالیێ، پێدڤییە ب تنێ بشێن ئالاڤێن سۆشیال میدیایێ یێن ئەخلاقی بكاربینن و نابیت بشێن ئالاڤێن سۆشیال میدیایێ یێن وەكی تیك تۆك، ئینستاگرام و سناپچەتی بكاربینن هەتا تەمەنێ وان نەگەهیتە 18 سالان».
ئاماژە ب وێ چەندێ ژی كریە «پێدڤیە هەمی جۆرێن شاشەیان ژ زارۆكێن د بن 6 سالیێ دا و ل باخچەیێن زارۆكان بهێنە قەدەغەكرن».
راپۆرتێ رەخنە ل پیشەسازییا تەكنولۆژیایی گرتییە و دیاركریە كو ئەو پیشەسازییە بزاڤان دكەت قازانجان ب رێكا زارۆكان بدەستڤەبینیت.
