هەرێما كوردستانێ پێدڤی ب 10 كارگەهـ و عمبارێن ساركرنێ یە
هەرهین محەمەد:
ئەندامەكێ ژوورا بازرگانی و پێشەسازی ل دهۆكێ دیار كر، هەرێما كوردستانێ پێدڤی ب دەه كوگەه و كارگەهایە ژ بۆ بەرهەمێ خۆمالی و پشتەڤانی بهێتەكرن دێ كەرتێ گشت و گوزاری و پێشەسازی پێشكەڤیت و هەر دیسان ئەرزانی ژی دێ د بازاری دا زێدەتر لێهێت و هەتا رادەكی ئاریشا بێكاریێ ژی دێ كێمتر لێهێت.
حكمەت روستینكی، ئەندامێ ژوورا بازرگانی و پێشەسازی ل دهۆكێ گۆت: كەرتێ پێشەسازی چێكرنا هندەك بەرهەم و ب رێیا هندەك ئامیرەیان وەكو كارگەهان كوگەهان چێكەین و بێخینە د خزمەتا خەلكی دا و پێدڤیە حكومەتا هەرێما كوردستانێ پشتەڤانیێ بكەن و كارگەهێن مەزن د هەموو بوران دا چێكەن، دا كو كەرتێ پێشەسازی پتر رۆلێ خوە ببینیت، چونكو ئەڤی كەرتی گرنگیا خوە هەیە و گرێدانەكا ئێكسەر ب كەرتێ چاندنێ هەیە.
زێدەتر گۆت: ئەگەر كارگەه بهێنە ڤەكرن، جوتیارێن دێ پتر چاندنێ كەن و د سەر هندێ را چاندنەكا گەلەك باش دكەن و بەرهەمەكێ باش بەرهەم دئینن، هەتا كو ئەو بەرهەمە ژی دچیتە خواریا عیراقێ وەكو هناران و تری و گەلەك بەرهەمێن دی، ئەڤە ژی تشتەكێ گەلەك باشە ژ بۆ پێشڤەچوونا كەرتێ پێشەسازی.
خویاژی كر، هەكە كارگەه د هەموو بواران دا بهێنە ڤەكرن، بەرهەمێن خومالی دێ چنە دەرڤەی وەلاتی، ب مخابنی ڤە دبێژم چەند سالە جوتیارێن مە بەرهەمێ خوە دكەن و دبیت ئەوان چ پلان نەبن، لەورا پتریا بەرهەمێ وان ب هەروە دچیت و ئەڤ چەندە ژی دبیتە ئەگەر ئەو بەرهەمێ مشە چاندی ئەرزان بیت د بازاری دا.
ئاشكرا ژی كر، مە گەلەك بەرهەمێن وەرزی هەنە، وەكو هنارێ و ب تنێ ل وەرزێ پایزێ یا خۆمالی دەردكەڤیت و هەتا دبیتە زڤستان بەرهەمێن بیانی دهێنە د بازاری دا، بەلێ هەكە ل گەل هەبوونا كارگەهان كوگەهێن سار ژی هەبن، ئەو بەرهەمێ ژ كارگەهان زێدەدكەت بچیتە د كوگەهێن ساردا ژ بۆ وەرزەكێ دی مفای ژێ ببینن دێ باشتربیت، چونكو ئەو بەرهەمێن بیانی دهێنە د بازاری دا بەرانبەری وێ داهاتەك دچیتە ژ دەرڤەی وەلاتی و ئەڤ چەندە ژی كارتێكرنێ ل ئابورێ وەلاتی دكەت.
زێدەتر گۆت: هەرێما كوردستانێ گەلەك ژ لایێ ئاخ و ئاڤێ ڤە یا دەولەمەند و جوتیارێن مە چ بچینن شوین دبیت و بەرهەمەكێ باش دئینن و ل ئەڤێ دووماهیێ ژی خەلكێ مە گەلەك خواست ل سەر بەرهەمێ خۆمالی هەیە، چونكو بەرهەمەكە ماددێن كێمیایی كێم بۆ دهێنە بكارئینان و دیسان گەلەك یێ ب تامە ژی، وەكو هنار و سێڤ و باجانسورك و خیار هتد.. و دبینم هەرێما كوردستانێ ب گشتی پێدڤی ب دەه كارگەه و كوگەهایە ژ بۆ پاراستنا بەرهەمێ خۆمالی.
