هەرێما كوردستانێ دێ بیتە ناڤەندەكا مەزن یا بازرگانی ل دەڤەرێ
هەولێر، قائید میرۆ:
بەرپرسەكێ ئێكەتیا وەبەرهێنەرێن كوردستانێ دیاركر، سەرۆكێ حوكمەتا هەرێما كوردستانێ ل داڤۆسێ داخواز ژ وەبەرهێنەرێن بیانی كریە بهێنە هەرێما كوردستانێ و دێ هەرێم بیتە ناڤەندەكا مەزن و ستراتیژیا بارزگانی ل دەڤەرێ.
كەمال گەردی، جێگرێ سەرۆكێ ئێكەتیا وەبەرهێنەرێن كوردستانێ بۆ رۆژناما ئەڤرۆ دیاركر، ل كۆڕبەندێ داڤۆسێ چەندین دیدارێن گرنگ د ناڤبەرا مەسرور بارزانی، سەرۆكێ حوكمەتا هەرێما كوردستانێ و شاندێن بیانی هاتینە ئەنجامدان و گۆت: «سەرۆكێ حوكمەتێ بەحسێ سەقامگیریا هەرێمێ بۆ وەبەرهێنەر و بازرگانێن بیانی كریە و داخوازكریە بهێنە هەرێمێ بۆ وەبەرهێنانێ و گەرەنتیا سەرمایێ وانا دێ هێتە كرن».
كەمال گەردی گۆت ژی: «سەرۆكێ حوكمەتێ گەلەك پشتەڤانیا كەرتێ وەبەرهێنانێ دكەت و یێ بزاڤان دكەت، هەرێما كوردستانێ بكەتە ناڤەندەكا مەزن و ستراتیژی یا بازرگانی ل سەر ئاستێ دەڤەرێ و بەردەوام وەبەرهێنەرێن بیانی ژی سەرەدانا هەرێما كوردستانێ دكەن و ئەڤان سالێن بۆری كەرتێ وەبەرهێنانێ قووناغێن باش دەربازكرینە و بەر ب ڤەژاندنا زێدەتر دچیت».
