هەرێما كوردستانێ دێ مفای ژ ئەزموونا قەتەرێ وەرگریت
سەرۆكێ دەستەیا وەبەرهێنانێ ل هەرێما كوردستانێ دبێژیت: پەیوەندیێن سەرۆكوەزیران مەسرور بارزانی و سەرەدانا وی بۆ وەلاتێن كەنداڤی پێنگاڤەكە بۆ هندێ، وەبەرهێنانا وان وەلاتان ل هەرێما كوردستانێ زێدە ببیت و كەرتێ ئابووری گەشە بكەت.
د. محەمەد شوكری، سەرۆكێ دەستەیا وەبەرهێنانێ بۆ رۆژناما ئەڤرۆ دیار كر، ئارمانجا سەرەدانا مەسرور بارزانی، سەرۆكوەزیرێن هەرێما كوردستانێ بۆ قەتەر بۆ مفا وەگرتنێیە ژ ئەزموون و شارەزاییا برێڤەبرنا ئابووری و بازرگانی و شیانێن وزەیا وی وەلاتی، هەروەسا ئارمانجەكا دیتر یا سەرەدانا سەرۆكوەزیران ئەوە، وەبەرهێنانا قەتەری د كەرتێ ئابووری، چاندنێ، گەشتوگوزار و وزەیێ بینیتە هەرێما كوردستانێ، چونكی قەتەر ژ روویێ وەبەرهێنانێڤە وەلاتەكێ پێشكەفتییە و ل چەندین وەلاتان وەبەرهێنانێ دكەت.
ناڤهاتی گۆت: «وەلاتێن كەنداڤی ب گشتی ژ روویێ ئابووری و سیاسیڤە ل رۆژهەلاتا ناڤین گەلەك د گرنگن، هەروەسا هەلكەفتەیا جوگرافییا ستراتیجی یا هەرێما كوردستانێ و پەیوەندیێن وێ ل گەل ئەوان وەلاتان وەكرییە، كوردستانێ پێگەهـ و ستراتیجیا خۆ یا تایبەت ل ڤێ دەڤەرێ هەبیت، ئەڤە دێ بیتە ئەگەرێ هندێ ژ روویێ وەبەرهێنانێڤە مفای ژ ئەزموونا وەلاتێن كەنداڤی وەربگرین، هەروەسا پەیوەندییێن مەسرور بارزانی، سەرۆكوەزیرێن هەرێما كوردستانێ ل گەل سەركردێن سیاسی و ئابۆری یێن كەنداڤی، دێ بیتە ئەگەرێ هندێ كو ئابوورێ هەرێما كوردستانێ د داهاتی دا سەقامگیر بیت و وەبەرهێنان ل هەرێما كوردستانێ زێدە ببیت».
