هەرێما كوردستانێ و ئیراق ل سەر بجهئینانا سیستەمێ گومرگی یێ (ئەسیكۆدا) ڕێككەفتن
شیرەتكارەكێ وەزارەتا ناڤخۆ یا هەرێما كوردستانێ راگەهاند، كو هەولێر و بەغدا ل سەر بجهئینانا سیستەمێ ئەلیكترۆنی یێ گومرگی (ئەسیكۆدا) رێككەفتن، و د ڤێ رێككەفتنێ دا هەموو یاسا و تایبەتمەندیێن هەرێما كوردستانێ هاتینە پاراستن.
سامی جەلال، شیرەتكارێ وەزارەتا ناڤخۆ یا هەرێما كوردستانێ، ب رۆژا چارشەمبی 8/4/2026 دیار كر: « شاندێن هەرێما كوردستانێ و حوكمەتا ئیراقێ ل سەر سیستەمێ ئەسیكۆدا گەهشتنە رێككەفتنێ.»
ناڤبری ئاماژە ب وێ چەندێ ژی كر كو د بجهئینانا ڤی سیستەمی دا، هەموو یاسا و تایبەتمەندیێن هەرێمێ هاتینە ل بەرچاڤگرتن.
سەبارەت پێنگاڤێن بجهئینانێ، سامی جەلال گۆت: «ڕۆژا ئێكشەمبی 12/4/2026، ل هەولێرێ كۆمبوونەك د ناڤبەرا هەردو هەولێرێ و بەغدایێ دا دێ هێتە ئەنجامدان. ڕۆژا پاشتر (دوشەمبی 13/4/2026) هەردو شاند دێ بەرەڤ بەغدایێ چن و ل جڤاتا ئابۆری یا ئیراقێ رێككەفتن دێ ب فەرمی هێتە ئیمزاكرن.»
هەروەسا دیار كر كو رێڤەبەریا گشتی یا گومرگێ ل هەرێما كوردستانێ دێ سەرپەرشتییا ڤی سیستەمی كەت.
ژ ئالیێ خۆ ڤە، وەزارەتا دارایی یا ئیراقێ د بەیاننامەیەكێ دا ئاشكرا كر كو ب سەرپەرشتییا تەیف سامی، وەزیرا دارایی، هەولێر و بەغدا ل سەر ئێكخستنا رێكارێن گومرگی رێككەفتینە. ئێك ژ خالێن گرنگ یێن رێككەفتنێ ئەوە كو بڕیار هاتە دان زمانێ كوردی ژی بۆ ناڤ سیستەمی بهێتە زێدەكرن، دا كو ل رەخ زمانێن عەرەبی و ئینگلیزی د فۆرمێن فەرمی دا بهێتە بكارهێنان.
د كۆمبوونێ دا كو رێڤەبەرێن گشتی یێن گومرگا فیدرالی و هەرێما كوردستانێ و تیمەكا شارەزا ژ رێكخراوا (ئۆنكتاد) یا نێڤدەولەتی بەرهەڤ بوون، بڕیار هاتە دان تیمەكا تایبەت ب ناڤێ (تیما ئەسیكۆدا یا هەرێما كوردستانێ) بهێتە پێكئینان و ببیتە پشكەك ژ تیما نیشتمانی یا ئێكگرتی.
هەروەسا رێككەفتن ل سەر پڕوگرامەكێ راهێنانێ یێ بەرفرەهـ هاتە كرن، دا كو فەرمانبەرێن هەرێما كوردستانێ یێن كو ل سەر ڤی سیستەمی كاردكەن بهێنە راهێنان، ب مەرەما بلندكرنا ئاستێ وان یێ تەكنیكی و ئێكخستنا پێڤەرێن بڕێڤەبرنا گومرگی ل هەموو دەروازەیێن سنۆری.
