هەر جهەكێ گەشتیاری پێگیریێ ب زمانێ كوردی نەكەت دێ هێتە سزادان
ئەڤرۆ
هەولێر، قائید میرۆ:
پەیڤدارێ دەستەیا گشتیا گەشتوگوزارێ ل هەرێما كوردستانێ ئاشكرا كر، هەر جهەكێ گەشتیاری پێگیریێ ب بڕیارا حوكمەتێ نەكەت ل دۆر بكارئینانا زمانێ كوردی دێ هێتە سزادان و دبێژیت: چاڤدێریا جهێن گەشتیاری دهێتە كرن، كو پێگیریێ ب بڕیارا حوكمەتێ بكەن.
ئیبراهیم عەبدولمەجید، پەیڤدارێ دەستەیا گەشتوگوزارێ بۆ رۆژناما ئەڤرۆ دیار كر، سالا بۆری دەستەیا گەشتوگوزارێ بڕیار ل دۆر زمانێ كوردی دەكریە و هەموو بنگەهێن گەشتیاری یێن مۆهلەتا گەشتیاری هەی پێگیریێ بكارئینانا زمانێ كوردی بكەن، تابلۆیێن خوە ب زمانێ كوردی بنڤیسن، هەروەسا لیستا پێشكێشكرنا خزمەتگوزاریان ب زمانێ كوردی بیت، چونكی زمانێ فەرمی ل هەرێما كوردستانێ زمانێ كوردیە و گۆت: «لیژنەیەك ب مەرەما چاڤدێریكرنا جهێن گەشتیاری هاتیە پێكئینان بۆ بجهئینانا بڕیارا زمانێ كوردی، هەر جهەكێ گەشتیاری پێگیریێ پێ نەكەت، جارا ئێكێ بۆ دەمێ سێ رۆژان دێ هێتە گرتن ئەگەر دوبارە ببیت ئەڤە دێ سزایێن دژوارتر هەبن».
ئیبراهیم عەبدولمەجید گۆتژی: «بڕیارا سەرۆكێ حوكمەتێ بۆ بكارئینانا زمانێ كوردی ل هەموو جهێن گەشتیاری دێ هێتە بجهئینان، راستە بەری نوكە ئەو بڕیار هاتیە بجهئینان ژ لایێ دەستەیا گەشتوگوزارێ ڤە، بەلێ بڕیارا سەرۆكێ حوكمەتێ دێ زێدەتر مە هاندەت پێگیریێ ب زمانێ كوردی بكەین و چاڤدێریێ ل سەر جهێن گەشتیاری بكەین».
