هەر خێزانەكا بەرمایكێن خوە ل زاویتەی بهێلیت دێ هێتە سزادان
سندس سالح سلێڤانەیی:
هەتا نوكە ل هندەك سەیرانەگەهێن سنۆرێ ناحیا زاویتە، دەمێ هندەك خێزان دچنە سەیرانێ، پشتی ب دووماهی دهێن بەرمایكێن خوە دهێلنە دجهدا و ناڕاكەن. سەرۆكێ باژێڕڤانیا زاویتە ژی دبێژیت: كامیرە ل وان جهان هاتیە دانان و هەر خێزانەكا بەرمایكێن خوە نەڕاكەت و جهێ خوە پیس بكەت، دێ ب گۆژمەكێ پارەی هێتە سزادان.
موسا خەلیل، ماموستایەكە دبێژیت: ئەز رۆژانە هاتنوچوونا ڤی جهی دكەم، ڕاستە ژ بەرێ باشترە، بەلێ هێشتا هندەك خێزان هەنە و ب دیتنا من (بیانی) نە، ژ هندەك پارێزگەهێن عیراقێ دهێن دەمێ خوارنێن خوە دخۆن جهێ خوە پاقژ ناكەن و بەرمایكێن خوە دهێلنە دجهدا، لەورا فەرە تیمێن گەڕۆك یێن باژێڕڤانیێ لێپرسینێ ل گەل وان بكەن و ل گۆڕەی یاسایێ سزا بدەن، چونكو ئەم رازی نابین خەلكەكێ بیانی بهێت وەلاتێ مە پیس بكەن و ژینگەهەكا باژێرێن مە پیس بكەن.
تەحسین محەمەد، وەلاتیەكێ وێ دەڤەرێ یە، ئەو ژی دبێژیت: ئەڤ دیاردە یا مای و هێشتا خەلكەك یێ هەی رەوشەنبیریا پاراستنا ژینگەهێ ل دەف نینە و پشتی ژ سەیرانا خوە ب دووماهی دهێن جهێ خوە دهێلنە وەسا، لەورا پێدڤیە ئەو كەس بهێنە سزادان و سزادانا وان گۆژمەكێ زۆڕێ پارەی بیت دا جارەكا دی وێ چەندی دوبارە نەكەن.
ئەندازیار (نەوزاد عەبدوللا) سەرۆكێ باژێرڤانیا زاویتە دبێژیت: راستە ئەم ژی ئاگەهداری وێ چەندێ ینە كو هێشتا هندەك گەشتیار دەمێ دهێنە سەیرانگەه و جهێن گۆزاری ل دەڤەرا مە پاقژیا ژینگەهێ ناڕاگرن و بەرمایكێن خوارنێن خوە ل گەل گلێشی دهێلنە ل جهێ خوە و رادبن، ب راستی بەری هەر تشتەكی دڤێت ئەو هەست ب وێ چەندێ بكەن كو جهە مۆلكێ گشتی یە و پشتی ئەو دچن دێ خێزانەكا دی هێتە وی جهی، ئەڤ هەستە یا كێمە و رەوشەنبیریا پاراستنا ژینگەهێ ل دەف نینە، لێ دسەر ڤێ چەندێ ڕا تیمێن گەرۆك یێن ژینگەهێ هەنە و بەردەوام سەرەدانا وان جهان دكەن و عەلاگەیێن گلێشی ددەنە وان و دبێژنێ دەمێ هوون ب دووماهی دهێن بەرمایكێن خوە بكەنە تێدا و بكەنە د سەلكێن گلێشی دا، دا تیمێن باژێرڤانیێ بشێن راكەن، هەروەسا كامیرەیێن چاڤدێریێ ژی ل وان جهان هاتینە دانان و ژ نوكە وێڤە هەر زێدەگاڤیەكا ل سەر ژینگەهێ بهێتە كرن، هەروەسا هەر شۆفێرەكێ گلێشێ خوە د ترۆمبێلێ دا بهاڤێژیت دێ ب گۆژمەكێ پارەی سزادەین، كو ئەو ژی ژ دەه هزار دیناران دەستپێدكەت هەتا (500) هزار دیناران.
