هەر شەڕەکێ رووبدەت رۆژهەلاتا ناڤین دێ تووشی قەیرانەکا مەزن کەت
مەترسیا شەڕەکێ د ناڤبەرا ئیرانێ و ئسرائیلێ دا هەیە، چاڤدێرێن سیاسی ژی دیار دکەن، نها رەوش گەلەک خرابە و هەکە ئیران ئێرشی ئسرائیلێ بکەت ئەو یەک دێ بیتە ئەگەرێ شەڕەکێ مەزن و دێ کاریگەریا ل سەر هەموو رۆژهەلاتا ناڤین و جیهانێ ژی هەبیت.
پشتی گەفێن ئیرانێ یێن بۆ بەرسڤددانا ئسرائیلێ، سەرۆکێ ئەمریکا راگەهاند ئیرانێ بەرهەڤیێن خوە کرینە و دڤێت ئێرشی ئسرائیلێ بکەت، هەکە ئیران کارەکێ وەسا بکەت وەکو ئەمریکا ئەو دێ ب هەموو شیانێن خوە پشتەڤانیێ ل ئسرائیلێ کەن، ل ئالیێ دی بەرپرسێن ئسرائیلێ ژی دیار دکەن، هەکە ئیران ئێرشی وان بکەت ئەو دێ راستەوخوە ل ئیرانێ دەن.
د ڤێ دەربارێ دا فەهیم تاشتەکین ڤەکۆلەرێ ناڤدار یێ تورکیا راگەهاند، نها پتر ژ هەر دەمەکێ مەترسیا شەڕەکێ مەزن د ناڤبەرا ئیرانێ و ئسرائیلێ دا هەیە، چونکی هەر شەڕەکێ روو بدەت دێ گرۆپێن چەکدارێن سەر ب ئیرانێ ژی شەڕی کەن، ئانکۆ تنێ شەڕەک سنۆردار نابیت و دێ کاریگەریا خوە ل سەر هەموو دەڤەرێ هەبیت، هەرچەندە هەتا نها ئاماژێن وەسا نینن کو نیشا بدەن دێ ئیران ئێرش کەت، دبیت ئێرشا ئیرانێ یا سنۆدار ژی بیت، چونکی پشتی ئێرشا ل سەر بالیۆزخانا ئیرانێ یا ل شامێ دەستهەلاتا ئیرانێ گەلەک تەنگاڤ بوویە و بەرپرسێن ئیرانێ وەسا دبینن هەکە بەرسڤا ئسرائیلێ نەدەن دێ پێگەهێ ئیرانێ ل سەر ئاستێ رۆژهەلاتا ناڤین گەلەک یا لاواز بیت، ژ بەر ڤێ یەکێ ژی ئیرانێ دڤێت بەرسڤەکا سنۆردار هەبیت و نیشا بدەت کو وێ ئەو شیان هەنە بشێت بەرەڤانیێ ژ خوە بکەت، لێ هەر ئێرشەکا ئیرانێ یا بێی بەرسڤ نابیت و رەنگە بەرسڤا ئسرائیلێ گەلەک یا توند بیت، ژ بەر ڤێ یەکێ ژی ئەمریکا و گەلەک وەلاتێن دی یێن جیهانێ یێ بزاڤا ڤێ یەکێ دکەن دا کو ئیرانێ رازی بکەن دەست ب چو ئێرشەکێ نەکەت.
د. سادق زیباکەلام مامۆستایێ زانکۆیێ و بسپۆرێ پەیوەندیێن نێڤدەولەتی ژی ئەو یەک دیار کر، هەر شەڕەک روو بدەت دێ زیانەکا خوە یا گەلەک مەزن بۆ ئیرانێ هەبیت، چونکی ئسرائیل وەلاتەک گەلەک بهێز، چەکێ گەلەک مۆدێرن و پێشکەفتی د دەستێ وێ دا هەنە، ئسرائیل دشێت دربێن کوژەک ل ئیرانێ بدەت، دێ ئیران تووشی قەیرانەکا گەلەک مەزن بیت، نها ژی رەوشا ژیانا خەلکی گەلەک خرابە و گۆت: (دڤێت ئەم باش بزانین رۆسیا و چین ژی حەز دکەن شەڕەک وەسا روو بدەت، ژ بۆ رۆسیا دێ باش بیت چونکی دێ سەرنجا جیهانێ ل سەر شەڕێ ئۆکرانیایێ نەبیت و ل ئالیێ دی دەمێ ئیران لاواز بیت دێ پتر پێدڤی رۆسیا بیت، سیاسەتا رۆسیا ل هەمبەر ئیرانێ د دەمێن بۆری دا گەلەک خراب بوویە، رۆسیا ب چو رەنگەکێ نەڤێت ئیران بهێز کەڤیت، هەردەم رۆسیا بزاڤا ڤێ یەکێ کریە ئیران یا لاواز بیت دا پتر پێدڤی وێ بیت و یا نەچار بیت هەموو داخوازیێن رۆسیا قەبوول بکەت).
ناڤهاتی ئەو یەک ژی دیار کر، ب سالانە چین مفایەکا گەلەک مەزن یا ئابووری ژ ئیرانێ وەردگریت، ژ بەر سزایێن ئەمریکا و وەلاتێن رۆژئاڤایی ئیران گەلەک پێدڤی چینێ یە، چین ژی ل گۆر کەیفا خوە سەرەدەریێ ل گەل ئیرانێ دکەت، نها ژی دێ بۆ چینێ گەلەک یا باش بیت کو ئیران لاوازتر ببیت دا ئەو بشێن پەترۆلا ئیرانێ ل گۆر کەیفا خوە بکڕن و ئیرانێ بکەنە بازارەکا مەزن بۆ بەرهەمێن خوە، ژ بەر ڤێ یەکێ ژی لاوازبوونا ئیرانێ د بەرژەوەندیا چینێ دایە و گۆت: (دڤێت بەرپرسێن ئیرانێ خواندنەکا راست و دروست بۆ رەوشا نها بکەن، دڤێت یێن ئیرانێ برێڤە دبەن هزرا هەموو تشتەکێ بکەن و خەلکی تووشی کارەساتەکا دی یا مەزن نەکەن، چونکی براستی ژی نها رەوشا ژیانا خەلکی ل ئیرانێ گەلەک یا خرابە).
ل ئالیێ دی گەلەک ژ چاڤدێرێن سیاسی ل ئەمریکا، ئۆرۆپا و رۆژهەلاتا ناڤین وەسا دبینن، مەترسیا شەڕەکێ مەزن یا هەی، چونکی تەهران ئێرشا ل سەر بالیۆزخانا خوە ل شامێ وەکو سڤکاتیێ دبینیت، هەتا نها وەلاتێن زلهێز ژی ئێرشا ل سەر بالیۆزخانا وێ شەرمزار نەکرینە، ژ بەر ڤێ یەکی ژی ئیرانێ دڤێت ب هەر رەنگێ هەی بەرسڤا ئسرائیلێ بدەت، چونکی بێدەنگیا ئیرانێ دێ کاریگەریەکا گەلەک مەزن ل سەر پێگەهێ وێ کەت، هەکە تەهران بەرسڤا ئسرائیلێ نەدەت گرۆپێن سەر ب وێ ئێدی وەکو جاران گۆهداریا وێ ناکەن و ئەو یەک دێ بیتە ئەگەر پێگەهێ ئیرانێ گەلەک لاواز بیت. هەژی ئاماژەپێدانێ یە، پشتی گەفێن ئیرانێ نها گەلەک ژ وەلاتێن جیهانێ داخواز ژ وەلاتییێن خوە کرینە ژ ئیرانێ دەرکەڤن و هەروەسا سەرەدانا وەلاتێن رۆژهەلاتا ناڤین ژی نەکەن.
