هەر قووناغەکا سەوەفانێ چارەسەریا خۆ یا هەی
د. فەرهاد تاهر هه‌مزانی، تایبه‌تمه‌ندێ نه‌خۆشی و نشته‌رگه‌ریێن هه‌ستییان و شكه‌ستنێ و گه‌هان دیاركر كو سه‌وه‌فان ئه‌وه، ئه‌و كركركا دناڤبه‌را گه‌هان دا خراب دبیت و هه‌ستی ژ ئێكدو دخۆن، ئه‌ڤجا چ ل چوكا یان حه‌وزێ یان هه‌ر گه‌هه‌كا دیتر بیت، ره‌نگه تووشی سه‌وه‌فانێ ببیت كو ئه‌و كه‌رستێ دناڤبه‌را هه‌ستی و گه‌هان دا خراب دبیت و هشك دبن و گۆت: سه‌وه‌فان هه‌موو گه‌هان دگریت و پتریا جاران مه دو جور یێن هه‌ین، ئێك دگه‌ل عه‌مری ئه‌و ب تایبه‌ت چوكا و حه‌وزێ دگریت و یا هه‌ی ژی كو گه‌نجا دگریت بۆ نموونه شكه‌ستنه‌كا به‌ری نوكه كو دروست نه‌چبیته جهێ خوه، یان هه‌ودانه‌ك یان لێدانه‌كێ و ب ڤی ره‌نگی.
دیاركر دناڤ جڤاكێ مه‌داپتر سه‌وه‌فانا چوكا یا به‌ربه‌لاڤه و گۆت: ژ نیشانێن سه‌وه‌فانێ ل ده‌ستپێكێ نه‌خۆش دێ هه‌ست كه‌ت گه‌هێن وی یێن هشك بووین، پاش ئێشان زێده‌دبیت ب تایبه‌ت سپێده‌هیان و دگه‌ل روونشتن و رابوونێ، ئێشان ژی زێده‌دبیت دگه‌ل سه‌ركه‌تنێ ب ده‌ره‌جا و ل ده‌مێ سه‌رمایێ.
د. فەرهاد هه‌مزانی دیاركر، ئه‌گه‌رێن سه‌ره‌كی یێن سه‌وه‌فانێ زێده‌بوونا كێشا له‌شی یه‌و بۆ خۆپاراستنێ چه‌ند كێشا وی كێمتر بیت، هه‌لبه‌ت دێ ئێشان كێمتربیت و دیسا باشتره ل ده‌مێ روونشتنێ گه‌له‌ك چوكێن خوه نه‌چه‌مینیت و نه‌ئێخیته بن خوه، هندی بشێت ب سه‌ر ژێهه‌لیان و ده‌ره‌جا هاتنوچوونێ نه‌كه‌ت و وه‌رزشێ بكه‌ت و ب تایبه‌ت چوونا مه‌له‌ڤانیان، ئه‌ڤ پێنگاڤه هاریكارن بۆ كێمكرن و گیروكرنا په‌یدابوونا سه‌وه‌فانێ.
ل دور چاره‌سه‌ریێ دیاركر، پلا سه‌وه‌فانێ بڕیارا رێیا چاره‌سه‌ریێ دده‌ت، هه‌كه ل ده‌ستپێكێ بیت هه‌لبه‌ت چاره‌سه‌ریا وێ یا ب ساناهی یه و ره‌نگه بۆ ده‌مێ شه‌ش هه‌یڤا هه‌تا ساله‌كێ ب ده‌رمانان بهێته چاره‌سه‌ركرن، د قوناغێن ناڤنجی دا ره‌نگه ب رێیا وه‌رگرتنا ده‌رمانان و ده‌رزیكان بیت و گۆت: ره‌نگه نه‌خۆش هزر بكه‌ت كو ب وه‌رگرتنا وان ده‌رزیكا دێ چاره‌بیت، یا راست ئه‌وه وه‌رگرتنا وان بو ده‌مه‌كی دێ نه‌خۆشی ژ خوارنا ده‌رمانێن ئێشكێمكرنێ دووركه‌ت و دێ ژ ئێشانێ ئارام بیت و پێن وی نه‌رم بن و ره‌نگه سه‌وه‌فانا نه‌خۆشی پتر لێنه‌هێت و دێ شێت هه‌تا راده‌یه‌كی ژیانا خوه دگه‌ل سه‌وه‌فانێ ده‌ربازكه‌تن و هه‌كه ڤان پێنگاڤان مفا ل نه‌خۆشی نه‌كر، رێیا دووماهیێ گوهورینا چۆکی یه و ئه‌ڤه نشته‌رگه‌ریه‌كا به‌ربه‌لاڤه ل جیهانێ و نوكه ل دهۆكێ ئه‌م دكه‌ین و ئه‌نجامێن وێ دباشن و گۆت: یا دروست د بابه‌تێ چاره‌سه‌ریێ دا ئه‌وه هندی نه‌خۆش بشێت خوه ژ ئه‌گه‌رێن سه‌وه‌فانێ دوور بكه‌ت.
