هەر كەڤالەكێ من چیرۆكەكا تایبەت هەیە
موسا خالد:
شێوەكار (سافیا عەلی) كو خەلكا ناحیا شێلادزێ یە و نوكە قوتابیە ل كولیژا هونەرێن جوان/ ل زانكۆیا دهۆك، د دیدارەكێ دا بۆ رۆژنامەیا ئەڤرۆ گۆت: دژیەكێ بچووكدا من حەزژ چێكرنا وێنەیێن سروشتی دكر، لەورا دەمێ من دەستپێكری پتر ئەز بەر ب چێكرنا كەڤالێن سروشتی ڤە چووم و ل دەمێ چێكرنێ گەلەك دلخۆش و ئارام دبم.
هەروەسا گۆت: ژبەركو سروشتێ دەڤەرا مە گەلەكێ جوانە، لەورا بەردەوام بزاڤێ دكەم ب كەڤالان دەربڕینێ ژوێ جوانیێ دكەم، ئانكو چیا و گەلی و دارستان و گولێن دەڤەرێ چێدكەم، ئەز چەندین تەكنیكان ب كاردئینم، ژوانا (ئاگریلیك، رەنگێن زەیتی، رەنگێن ئاڤی، پاستیل) و هەر كەڤالەكێ من چیرۆكەكا تایبە هەیە، ئەو ژی سروشتێ دەڤەرا مە ڤەدگریت و بزاڤێ دكەم بێدەنگیا سروشتی بكەمە دەنگ و هەر رەنگەك مۆدەكێ دگەل خوە دئینیت، بۆ نموونە رەنگێ سۆر دشێت ببیتە سومبۆلا هەرە جوان و رەنگێ شین رامانا ئارامی و كوراتیێ ددەت، كەسك هەستا ژیان و نووبوونێ، ئەڤ شیانا رەنگان بۆ حالەتێن جودا من سەرسام دكەن، هەروەسا هەستا ئافراندن و داهێنانێ بهێز دئێخیت، دەرخستنا رەنگەكێ نوو ژ تێكەلبوونا دو رەنگان بۆ من سحرەكا بەردەوامە و هونەرێ شێوەكاری رۆلەكێ گرنگ د ژیانا مرۆڤان دا دگێڕیت، وەك دەربڕینا هەست و سۆزان.
