هەسەدێ هەموو داخوازیێن تۆم باراکی رەتکرن
فەرماندارەکێ هەسەدێ دیار دکەت، نوونەرێ ئەمریکا داخواز کربوو هەسەدە هەموو هێزێن خوە ژ دێرازۆرێ، حەسەکێ و رەققە ڤەکێشیت و رادەستی هێزێن سووریێ بکەت، لێ هەسەدێ ئەو یەک ب توندی رەتکریە و دیار کریە ئەو دێ دەڤەرێن خوە پارێزن و رادەست ناکەن.
فەرماندارەکێ هێزێن سووریا دیموکرات کو ناڤێ وی نەهاتیە ئاشکرا کرن بۆ ئاژانسا ANHA دیار کریە، بەری چەند رۆژان تۆم باراکێ نوونەرێ سەرۆکێ ئەمریکا بۆ کاروبارێن سووریێ داخواز ژ هەسەدێ کربوو هەموو هێزێن خوە ژ رەققە، دێرازۆر و حەسەکێ ڤەکێشیت و وان دەڤەران رادەستی هێزێن سووریێ بکەت، لێ فەرماندارێ گشتی یێ هەسەدێ ب توندی ئەو یەک رەتکریە و ژ بۆ تۆم باراکی دیار کریە، ئەو ب چو رەنگەکێ دەڤەرێن خوە رادەست ناکەن و هێزێن سووریا دیموکرات دێ وان دەڤەران پارێزن یێن کو ل ژێر دەستێ وێ دانە.
هەمان فەرمانداری ئەو یەک ژی دیار کریە، ل گۆر رێککەفتنا دەهێ ئادارێ یا د ناڤبەر فەرماندارێ گشتی یێ هەسەدێ و ئەحمەد شەرعی دا پێدڤیە هەسەدە و شام پێکڤە لەشکرەکێ نوو ئاڤا بکەن، ئانکو دێ هەسەدە ل گۆر تایبەتمەندیێن خوە بیتە پارچەیەک ژ لەشکرێ سووریێ، لێ دیارە ژ ئالیێ بەرپرسێن شامێ ڤە خواندنێن شاش بۆ رێککەفتنێ هاتینە کرن، چونکی ئەوا نها تۆم باراک داخواز دکەت رادەستکرنا چەکانە و ئەو یەک ژ ئالیێ هەسەدێ ڤە ب توندی هاتیە رەتکرن، نها رەوشا سووریێ گەلەک ئالۆزە و هەسەدە هێزەکا گەلەک کاریگەرە و دێ شێت گەلەک دەڤەرێن دی یێن سووریێ ژی پارێزیت، ژ بەر ڤێ یەکێ ژی داخوازیێن تۆم باراکی گەلەک شاش بوون و ب توندی ژی هاتنە رەتکرن.
ئەو یەک د دەمەکێ دایە، کو بەری نها تۆم باراکێ نوونەرێ سەرۆکێ ئەمریکا دیار کربوو ئەو پشتەڤانیێ ل سیستەمەکێ فیدرالی بۆ سووریێ ناکەن و دڤێت سیستەمێ نوو یێ سووریێ ناڤەندی بیت، ژ بەر ڤێ یەکێ ژی کوردان، دورزیان و پێکهاتەیێن دی یێن سووریێ ب توندی هەلوەستێ نوونەرێ سەرۆکێ ئەمریکا رەتکرن و دیار کرن دڤێت سیستەمێ نوو یێ سووریێ نە ناڤەندی بیت دا هەموو نەتەوە و پێکهاتەیێن ل سووریێ بشێن پێکڤە بژین.
چاڤدێرێن سیاسی ل سووریێ و رۆژئاڤایێ کوردستانێ ژی دیار دکەن، دڤێت د دستوورێ نوو یێ سووریێ دا هەموو مافێن گەلێ کورد بهێنە گەرەنتیکرن و هەروەسا دڤێت ب پشکداریا کوردان و دورزیان لەشکرەکێ نوو بۆ سووریێ بهێتە دروستکرن، چونکی نها سووریێ چو لەشکر نینن و د ئێرشا ل سەر سوەیدا ژی دیار بوو، گرۆپێن چەکدارێن توندرەو ل ژێر ناڤێ لەشکرێ سووریێ گەلەک تاوان ل دژی دورزیان ئەنجام دان، ژ بەر ڤێ یەکێ ژی پێدڤیا سووریێ ب لەشکرەکێ نوو و رێکخستی هەیە.
