هەسەدە: ڤەکێشانا هێزێن ئەمریکا دێ بیتە ئەگەرێ بهێزبوونا داعشێ
فەرماندارەکێ هێزێن سووریا دیموکرات دیار دکەت، ڤەکێشانا هێزێن ئەمریکا ژ سووریێ دێ بیتە ئەگەرێ بهێزبوونا داعشێ و دێ رەوشا نها یا ئارام ل سووریێ تێک چیت، ژ بەر ڤێ یەکێ ژی دڤێت ئەمریکا جارێ هێزێن خوە ل سووریێ بهێلیت.
دوهی پەیڤدارێ وەزارەتا بەرگریێ یا ئەمریکا دیار کر، وان دەست ب ڤەکێشانا هندەک ژ هێزێن خوە ل سووریێ کرینە و دبیت کێمتر ژ هزار سەربازێن وان ل سووریێ بمینن و ژ بەر ڤێ یەکێ ژی ئەمریکا سێ بنگەهێن خوە یێن سەربازی ل سووریێ داخستینە.
ل ئالیێ دی فەرماندارەکێ هێزێن سووریا دیموکرات کو ناڤێ خوە ئاشکرا نەکریە بۆ دەزگەهێن راگەهاندنێ یێن سەر ب رێڤەبەریا خوەسەر دیار کریە، بابەتێ ڤەکێشانا ئەمریکا ژ سووریێ د رەوشا نها دا دێ کاریگەریا خوە یا خراب ل سەر رەوشا سووریێ هەبیت، ب تایبەتی ژی رێکخستنا تیرۆرستی یا داعشێ دێ جارەکا دی دەست ب کریارێن تیرۆرستی کەت، نها ل دەوروبەرێن دێرازۆری جارەکا دی چەکدارێن داعشێ بەرهەڤیان بۆ کریارێن تیرۆرستی دکەن و هەر دوهی چەند چەکدارێن داعشێ ئێرشێ هێزێن سووریا دیموکرات کرینە و ئەو یەک ژی نیشا ددەت ڤەکێشانا ئەمریکا ژ سووریێ دێ بیتە ئەگەرێ بهێزبوونا داعشێ و وەکو هێزێن سووریا دیموکرات ئەو وەسا دبینن مانا هێزێن ئەمریکا ل سووریێ د بەرژەوەندیا ئەمریکا و هەڤپەیمانێن وێ دانە.
هەر سەبارەت ب ڤەکێشانا هێزێن ئەمریکا و کاریگەریا وێ ل سەر رێڤەبەریا خوەسەر ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر دیار کر، بێگومان هەبوونا هێزێن ئەمریکا و وەلاتێن دی ل سووریێ ژ بۆ ئارامیێ گەلەک گرنگە، ئەمریکا د شەڕێ ل دژی داعشێ دا گەلەک هاریکاریا کوردێن سووریێ کریە، لێ وەکو رێڤەبەریا خوەسەر و کوردێن سووریێ وان هەردەم پشتا خوە ب هێزێن خوە گەرم کرینە و ڤەکێشانا ئەمریکا نابیتە ئەگەرێ مەترسیەکا مەزن ل سەر رۆژئاڤایێ کوردستانێ.
چاڤدێرێن سیاسی وەسا دبینن، ئەمریکا دێ هەر ل سووریێ و رۆژئاڤایێ کوردستانێ مینیت، بەلکو د چارچۆڤەیێ چاکسازیێن ترامپی دا، ئەمریکا دێ هژمارا سەربازێن خوە ل سووریێ کێم کەت، لێ ئەو یەک رامانا هندێ نادەت دێ ئەمریکا هەموو هێزێن خوە ژ سووریێ ڤەکێشیت و هەروەسا نها چەندین رێککەفتن د ناڤبەرا رێڤەبەریا خوەسەر و شامێ دا هاتینە ئیمزا کرن و پەیوەندیێن کوردان و شامێ باش بووینە و هەروەسا بریارە هێزێن سووریا دیموکرات و تورکیا ژی ئاگربەستێ راگەهینن، وی دەمی چو مەترسیەکا وەسا مەزن ل سەر رێڤەبەریا خوەسەر و کوردێن سووریێ نامینیت و بێگومان ئەمریکا، فرەنسا و وەلاتێن دی ژ بۆ بەرژەوەندیێن خوە دێ کوردێن سووریێ پارێزن و رێ نادەن شام یان ژی تورکیا ئێرشی کوردان بکەن، لێ گرنگە کوردێن سووریێ ژی رۆژ ب رۆژێ کار بۆ بهێزکرنا پێگەهێ خوە یێ سیاسی و سەربازی ل سووریێ بکەن.
