هەشتی مـارس ژ بۆ وەكهەڤی و دادپـەروەریێ
دلـڤین رەشید
رۆژا جیهانییا ژنان، كو دكەڤیتە 8 ئادارێ، هەر سال ب هەلكەفتا ئەڤێ رۆژێ ئاهەنگێن جودا جودا دهێنەگێران، ئەڤ رۆژە رۆژەكا نێڤدەولەتی یە، ژبۆ ناساندن و بلندكرنا ماف و ئاستێن ژنان د هەر لایەكی ژیانێ دا. ئەڤ رۆژە نیشانەكە ژبۆ وان خەباتكەر و تێكۆشەران، ئەوێن ب درێژاهیا مێژوویێ بزاڤ ژبۆ بدەستڤەئینانا ماف و وەكهەڤیا جڤاكی كرین.
ژنێ د جیهانێ دا، رۆلەكی گرنگ هەبوویە ژبۆ پێشڤەبرنا جڤاكەكا خودان شارستانیەت، د وارێ خێزان و پەروەردەكرنا زارۆیان دا هەتا دگەهیتە وارێ زانستی و هونەری و سیاسی، ژن هەردەم پێشەنگ بوویە. بەلێ هێشتا چەندین ئاستەنگ دهێنە هەمبەری وێ و پێدڤیە بهێنە ژناڤبرن. رۆژا جیهانیا ژنان دبیتە دەرگەهەك ژبۆ هندێ كو ژن بشێت دەنگێ خۆ بگەهینیتە دەستهەلاتێ ل سەر گرنگیا یەكسانییێ و دادپەروەریێ د جڤاكێ دا.
د مێژوویا رۆژا جیهانیا ژنان دا ئەڤ رۆژە ل سالا 1908 دەستپێكر، ل وی دەمی ژنێن ئەمریكا بەرهنگاری نەوەكهەڤی و زولم و زۆرداریا جڤاكی بوون، پشتی هینگێ ل سالا 1977 دا ئێكەتیا نێڤدەولەتی رۆژا 8 ئادارێ وەك رۆژا جیهانیا ژنان دا دیاركرن ژوی دەمی و هەتا نها ئەڤ رۆژە ب شێوەیەكێ بەرفرەه ل سەرانسەری جیهانێ دا دهێتە ساخكرن.
ل كوردستانێ و دەڤەرێن كوردنشین، ژنان هەردەم رۆلەكێ گرنگ هەبوویە، د وارێ شەڕی و ئازادی و بەرەڤانیكرنێ ژ مافان. ژنا كورد د مێژوویێ دا وەكو پێشمەرگە و هۆزانڤان و چالاكڤانا مافێن ژنان دهاتە ناسكرن، بەلێ هێشتا چەندین ئاستەنگ و كێشەیێن جڤاكی و ئابووری ل پێشیا ژنا كورد ماینە و پێدڤیە بهێنە چارەسەركرن.
رۆژا جیهانیا ژنان تنێ رۆژەك نینە ژ بۆ گێرانا ئاهنگان، بەلكو رۆژەكە ژبۆ بیرئینان و چارەسەركرنا ئاریشەیان. پێدڤیە هەموو كەس نە بتنێ ژن بەلكو زەلام ژی دەستپێشخەر بن ل پێناڤی وەكهەڤی و دادپەروەریێ. پێدڤیە ژن مافێن خۆ د بیاڤێ پەروەردی و كاری و ساخلەمیێ و سیاسەتێ دا ب تەمامی بدەستڤە بینیت.
ل دوماهیێ دبێژم رۆژا جیهانیا ژنان دەلیڤەكە ژبۆ هندێ جیهانەكێ دورست بكەین كو تێدا ژن و زەلام ب وەكهەڤی بژین و هەر كەسەك مافێن خۆ ب تەمامی ب دەستڤەبینیت ژن ژیانە ژن هەستێ ژیانێ یە.
