هەشت گرۆپێن خۆبەخش ل ئاكرێ دێ خەتیرێن ئاگرێ نەورۆزێ هەلكەن
رەمەزان زەكەریا:
بۆ ئەڤ سالە مەراسیمێن ئاگرێ نەورۆزێ ل ئاكرێ، وەكو پایتەختێ نەورۆزێ ب تەمامی دێ هێنە ئەنجامدان، ب تنێ چو ئاهەنگێن جەماوەری ناهێنە ئەنجامدان، ژبەر رەوشا دەڤەرێ، داكو قەرەبالغی دروست نەبیت.
دلشاد عەلی، ڕێڤەبەرێ ڕەوشەنبیری و هونەری یێ ئاكرێ بۆ ئەڤرۆ گۆت: «ئامادەكاریێن تەمام بۆ نەورۆزا ئەڤ سالە هاتینە كرن، هەشت گروپێن خۆبەخش هەنە، دێ خەتیرێن ئاگری هەلكەن، بۆ ڤێ مەرەمێ ژی دو هزار و 726 خەتیر هاتینە ئامادەكرن، ئەڤ هەژمارەیە ئاماژەیە بۆ سەرسالا كوردی».
ناڤبری گۆتژی: «دو ئالایێن مەزن یێن كوردستانێ هاتینە ئامادەكرن، درێژاهیا هەر ئێك ژ وتن 60 مەترە و فرەهیا وان 10 مەترە، ئێك ژ وان ل سەرێ گری و یێ دی ل سەرێ تیشێ ل خرگا دێ هێنە بلندكرن، بەلێ ل سەرێ گری مەراسیمێن فەرمی ژ لایێ حكومەتا هەرێما كوردستانێ ڤە ناهێنە گێڕان، داكو قەرەبالغیەكا زێدە دروست نەبیت».
ناڤهاتی خویا ژی كر، مەراسیمێن ئاگرێ نەورۆزێ ل ئاكرێ ب تەمامی دێ هێنە بڕێڤەبرن و ئامادەكاری دبەردەوامن، ب تنێ ئاهەنگێن جەماوەری ناهێنە كرن، داكو كۆمبوونا خەلكی ب شێوەیەكێ زێدە دروست نەبیت، بەلێ هەلكرنا ئاگرێ نەورۆزێ دێ ب ڕێڤە چیت.
