هەشت یاریزانێن دهۆكێ دێ هەڤڕكیێ بۆ ناڤ رێزێن هەلبژارتیێ ئیراقێ كەن
د داخویانیەكێ دا راهێنەرێ تیما تێنسا ل سەر مێزێ بۆ رۆژنامەیا ئەڤرۆ دیار كر ل دووماهییا ڤێ حەفتیێ دێ ڤاڤارتنێن قۆناغا ڤەبڕ بۆ ناڤ ر َزێن هەلبژارتیێ ئیراقێ ل سەر ئاستێ ژیێن جودا یێن كوڕان و كچان ل پایتەختێ ئیراقێ بەغدا هێنە ئەنجامدان و هەشت یاریزانێن یانەیا دهۆك و پارێزگەهێ د ناڤ لیستەیا داخوزكری دا هەنە.
زێدەتر بەشار رەمەزان گۆت: بۆ وەرزێ نوو 2024ێ و پشكداری د قارەمانیێن دەرڤە دا ب ناڤێ هەلبژارتیێ ئیراقێ فیدراسیۆنا تێنسا ل سەر مێزێ ناڤێ 42 یاریزانێن كوڕ و 40 یێن كچ كو ئەوێن باشترینێن وەرزێ بۆری بەلاڤكرنینە ژبۆ پشكداریێ د ڤاڤارتنێن هەلبژارتیێ ئیراقێ كو هاتینە پۆلینكرن بۆ پێنچ ژییان و ئاستێن جودا، دناڤ ئەوان یاریزانێن هاتینە داخوازكرن هەشت یاریزانێن یانەیا دهۆك و پارێزگەهێ ل سەر ئاستێ كوڕان و كچان دێ پشكدارن ئەوا بڕیارە ل 22 هەتا 25ێ ڤێ مەهێ ل پایتەختێ ئیراقێ بەغدا بهێتە ئەنجامدان.
هەروەسان ناڤهاتی گۆت: هەر ئێك ژ یاریزان پیرس عەلی بۆ ئاستێ پێشكەفتیان، عەمار محەمەد جەمیل، جودی عەلی زێبار ئەحمەد بۆ ئاستێ لاوان، هێژا بەشار رەمەزان بۆ ئاستێ تازەپێگەهشتیان، یۆسف بەشار ل سەر ئاستێ پشكۆژان، محەمەد ریزا بۆ بن 13 سالی دا، دیسان ل سەر ئاستێ كچان سارا بەشار بۆ تازەپێگەهشتیان.
ژلایەكێ دووڤە بەشار رەمەزان گەشبینییا خوە دیار كر كو یاریزانێن دهۆكێ شیانێن هەین هەڤڕكیێ بۆ پلێتا دەربازبوون بەر ب رێزێن هەلبژارتیێ ئیراقێ بكەن و گۆت: هەرچەندە دێ ئەركێ وان ب سانەهی نینە ژبەركو ئەو یاریزانێن هاتینە داخوازكرن هەمی ژی خودان سەربۆرن و ل وەرزێ بۆری شیاینە رێزێن پێشیێ یێ قارەمانیێن ئیراقێ بینن، لێ گەشبینم یاریزانێن پارێزگەهێ ژی دێ هەڤڕكبن.
