هەفتەبازارەك بۆ بەرهەمێن خۆمالی ل ئامێدیێ دێ هێتە ڤەكرن
ئەڤرۆ
ئامێدیێ، مەحمود نهێلی
ژ بۆ فرۆتنا كەرەستە و بەرهەمێن خوەمالی و یێن چاندنێ نوكە بەرهەڤی دهێنە كرن بۆ ڤەكرنا هەفتە بازارەكی ل سنوورێ دەڤەرداریا ئامێدیێ.
ئەندازیار هەكار حەمید، رێڤەبەرێ چاندنا ئامێدیێ بۆ رۆژناما ئەڤرۆ دیار كر، رێڤەبەریا چاندنا دەڤەرداریا ئامێدیێ ب هەڤكاری ل گەل رێڤەبەریا گشتی یا چاندنێ ل پارێزگەها دهۆكێ و رێڤەبەریا راهێنانێن پیشەیی ل پارێزگەها دهۆكێ و ب پشتەڤانیا دارایی یا رێكخراوا (I L O) یا نیڤدەولەتی جهەك بۆ ڤەكرنا هەفتەبازارەكی بۆ فرۆتنا كەرەستە و بەرهەمێن چاندنێ و یێن خوەمالی ل دەڤەرێ دەستنیشان كریە و گۆت: «ئەڤ بازارە ژ چەندین دوكانان پێك دهێت و بەرهەمێن خوەمالی و چاندنێ یێن جۆتیاران تێدا دێ هێنە فرۆتن».
ناڤهاتی خویاژی كر، ئەڤ جهە ل سنوورێ ناوچەداریا سەرسنكێ دێ هێتە چێكرن و د پاشەرۆژێ دا ل جهێن دیتر ژی ئەڤ رەنگە بازارە دێ هێنە ڤەكرن و گۆت: «ب ڤەكرنا ڤان بازاران دێ ڤەلڤینەكا باش كەڤیتە دەڤەرێ و دێ بیتە دەلیڤەكا باش بۆ جۆتیاران ژی، كو بەرهەمێن خوە لێ ب فرۆشن».
