هەكە زەلام یێ نەزۆك بیت ژنێ ب رێكێن سۆزداریێ رازی دكەت
هەرهین محەمەد:
كورد هەردەم دبێژن زارۆك فێقیێ مالێ یە و ئەو مالا زارۆك تێدا نەبن كاڤلە و دبێژن ژی هەڤژینێن بێ زارۆك وەكو دارەكا بێ بەرهەمن، ئانكو حەزا هەر كور و كچەكێ یە دەمێ هەڤژینیێ پێك دئینن هەر سالا دەستپێكێ زارۆك هەبن، بەلێ گەلەك جاران نەبوونا زارۆكان ژ هەردو ئالیان ڤە ئاریشەیان پەیدا دكەن.
ماموستا دلگەش حەسەن ددەتە زانین یا نورمالە هەر كەسەك ل جهێ خۆ بەرپرسیارەتیا شاشیێن خوە وەرگریت و ئەگەر نەبوونا زارۆكان ژ زەلامی بیت دڤێت ئەوێ چەندێ ب نورمال وەرگریت و تەحەمولا ئەوێ بەرپرسیارەتیێ بكەت و پێدڤیە ل سەر نەبوونا زارۆكان یێ رازی بیت، چونكو تشتەكە نە ب مرۆڤی یە و خۆدێ وەسا حەز كریە كو زەلام نەبیتە خودان زاروك ب تایبەتی ئەگەر نەبوونا زارۆكان ژلایێ زەلامی ڤە بیت و گەلەك جاران ئەو چەندە رویدایە نەبوونا زارۆكان ژلایێ زەلامی ڤە بوویە و زەلامی وەسا هەڤژینا خوە رازی كریە كو بێژیتە هەر كەسەكی نەبوونا زارۆكان ژمنە، چونكو دبیت ئەوێ یەكێ ب شەرم و كێماسی بینت و ئەگەر ژی ئەوە جڤاكێ مە وەكریە زەلامێ مە چو جاران خوە نەچەمینت و دبیت گەلەك هەزایێن دی لێدایە، بەلێ خوە وەكو چیایەكی پاراستی یە.
گەنجەك بناڤێ مەتین وەرمێلی دبێژیت: ما كێ خوە ئافراندیە هەتا كو شەرم ژ ئافراندن و كێماسیێن خۆ بكەت ئەگەر هەڤژینی ل سەر بنەمایێ ڤیانێ هاتبیتە پێكئینان و پێدڤیە تێگەهشتنا ژن و مێران ل سەر ڤێ پرۆسەیا مەزن گرنگە یا باش بیت و بتنێ مەرەما وان هەڤژینی بیت و نەبوونا زارۆكان هەكە ژ كیژ لایەنی بیت دی گەلەك یا نورمال بیت و بەردەوام دێ دلە دلێ ئێك و دو ددەن و نەبوونا زارۆكان تشتەكێ نورمالە و گەلەك كەسان زارۆك نابن، بەلێ هەكە بەری هەڤژینیێ بتنێ ئارەزویا زەلامی بتنێ تێركرنا حەزێن وی بیت و هەبوونا زارۆكان بیت، بێگومان سەرەدەریا ویژی ل گەل ژنێ دێ وەكو یا كرێكارەكێ كری گرتی بیت كو ئەڤە ژی كارەكێ گەلەك كرێت و بێ سەروبەرە، لەورا رەوشەنبیریا ئاینی و زانستی گەلەك یا گرنگە بۆ هندێ مرۆڤ بزانیت حەزكرنا خۆدێ یا ل سەر هەركارەكی و گرنگە ئەگەر بەری هەڤژینیێ رەوشەنبیریا هەڤژینیێ بۆ كور و كچان بهێتە شرۆڤەكرن ژلایێ دەرونناسان ڤە و هشیاركرنا وان زێدەبیت و پشتی هەڤژینیێ دێ هەرتشتەكی نورمال وەرگرن و دیتنا وان ژی هەمبەری ئێك دێ لایەنێ سوزداری بیت وغەریزە و تێركرنا ئارازویان دڤێت زەلام خودان وژدان و ژنێ تومەتبار نەكەت ب نەزوكیێ.
ژلایێ خوە ڤە ڤەكولەرا دەرونی نەفەل شەریف ددەتە دیاركرن ئەگەرێ نەبوونا زارۆكان لدەف زەلامی و زەلام وی ئەگەری پالدەتە ژنێ و ئەگەرێ سەرەكی یێ ڤێ چەندێ سوزداریە و زەلام نەشێت سوزداریێ وەربگریت و ژنك دشێت سوزداریێ وەربگریت و زەلام ب هندەك رێكێن خوەش دهێتە ژنێ ژبەرکو یێ ژ خوە بێ هیڤی یە و نەشێت چو ژنێن دی بینت و دێ هێت ژنێ رازی كەت ب رێكا سوزداریێ ب گۆتنێن خوەش و دێ ژنێ رازیكەت ئەڤێ چەندێ وەربگریت و هەركەسەكێ پرسیار بكەت و ئەو بێژیت ئەز یا نەزوكم نەزەلامێ من و هەردیسان ژلایێ مادی ژی ڤە كارتێكرنا خوە هەیە و ژن هەردەم یا لاوازە و دبینت ژلایێ مادی ژی ڤە مالا بابێ وی هند شیان نین و كەس نەشێت ئەوێ خودان بكەت، لەورا دێ ب ئەوی كاودانی رازی بیت و زارۆكان بخو ناكەتە خەم و هەتا دەمەكێ درێژ پێ دچیت دێ هەست ب هندێ دكەت حەز دكەت زارۆك هەبن.
