هەكە هونەر نانی نەدەت نە هونەر دمینیت نە گەنج
هیڤی كەریم:
شرین ئەیوب، ئەكتەرەكا گەنجا خەلكا دهۆكێ یە، ژیێ وێ (28) سالن و نوكە قوتابیە ل كولیژا هونەرێن جوان ل قوناغا دووماهیێ ل زانكۆیا دهۆك، د دیدارەكێ بۆ رۆژنامەیا ئەڤرۆ گۆت: بەری شەش سالان دەمێ ئەز قوتابی ل پەیمانگەها هونەرێن جوان، وەكو ئەكتەر بۆ جارا ئێكێ من پشكداری د شانۆگەریەكێ دا كر، پاشان بەردەوام بووم و هەتا نوكە من پشكداری د شەش كارێن هونەری دا كریە، بەلێ ئەو كارێ ژ هەموویان پتر بوویە ئەگەر كو ئەز پێ بەرنیاسبم و سەركەفتنێ تێدا ببینم، شانۆگەریا (كولاڤ و پەیك) بوو، كو ژدەرهێنانا ماموستا و هونەرمەند (عادل حەسەن) ی بوو.
هەروەسا گۆت: من ئەكتەری هەلبژارت ژبەركو من خوە دڤی كاری دا د دیت و حەزا من بۆ ئەكتەریێ وەل منكر ئەز پتر خوە تێدا پێشبێخم و شیانێن خوە دیاربكەم و ئەز شیایمە پەیامێن خوە ب رێكا هونەری بگەهینم، نوكە ژی كارەكێ دی د دەست دایە، بەلێ یێ جوودایە ژ كارێن دی، ئەو ژی من ل بەرە وەك ئەزموونەكا نوو دەست ب ئێكەم كارێ دەرهێنانێ بكەم.
