هەكە پارەیەكێ باش نەبیت بەرهەمێن باش ژی نابن
عەزیز هەورامی:
ئەكتەرێ بەرنیاس (جەزا ئەحمەد سەعید) د دیدارەكێ دا بۆ رۆژناما ئەڤرۆ گۆت: هەردەم من گۆتیە ئەركێ وەزارەتا رەوشەنبیری یە خوە ل فلم و درامایێن كوردی بكەتە خودان دابەرێ خەلكێ مە ژ فلم و درامایێن بیانی، ب تایبەت ژی ئەوێن دهێتە دۆبلاژكرن ڤەبیت، هەروەسا كەنالێن مە یێن تەلەفزیۆنی ژی وەك پێدڤی ب ئەركێ پێشڤەبرنا ئاستێ فلم و دراما نە رابووینە، چنكو هندەك كەنال هەنە دشێن زنجیرە و فلم و درامایێن خۆمالی بەرهەم بینن، هەروەسا پێدڤیە كۆمپانیێن كەرتێ تایبەت ژی ب وی ئەركی راببن و بزاڤێ بكەن هەر ئێك ژلایێ خوڤە ئاستێ هونەرێ كوردی پێشڤەببەن.
هەروەسا گۆت: راستە ئاستێ فلم و درامایێن بیانی باشترە، چنكو ئەو خودان دەولەتن، هەروەسا تەكنیك و تەكنەلۆژیا باش ل بەر دەست هەیە، لێ دڤێت ئەم ژی پتر خوە ب وەستینین و بەرهەمێن باش و خۆمالی چێكەین، لێ جارەكا دی دێ بێژم ئەڤە هەموو گرێدای پشتەڤانیێ یە و هەتا پارەكێ باش نەبیت بەرهەمێن باش ژی نابن، راستە كێماسی یێن هەین بەلێ هەتا رادەكی بەرهەمێن باش ژی یێن هەین و هەموو دخراب نینن.
ناڤهاتی، ل سالا 1983 دەست بكارێ هونەری كریە، پشكا شانۆیێ ل پەیمانگەها هونەرێن جوان ل سلێمانیێ ب دووماهی ئینایە.
