هەكە گوندێن كوردستانێ نەبان شۆڕەش بەردەوام نەدبـوو
سالار محەمەد دۆسكی:
1- 6
پێشمەرگەیێ شـــــــــــــۆڕەشا گولانا پێشكەفتنخواز، رزگار سالح كەمەكی، ل سالا 1956 ژ دایك بوویە خواندانا خوە یا سەرەتایی و ناڤنجی و ئامادەیا بازرگانی ل دهۆكێ تەمامكرینە، و پشتی سەرهلدانا پیرۆز كولیژا كارگێری و ئابووری ل زانكویا دهۆك ب دووماهی ئینایە، ناڤبری ژ بنەمالەكا كوردپەروەر و خودان شەهید بووینە.
رزگار سالح كەمەكی، د دیدارەكێ بۆ رۆژناما ئەڤرۆ گۆت: بیرا من ل هەبوونا پێشمەرگەی دهێت ل گوندێ كەمەكا هێشتا زارۆك و بیرا من دهێت فرۆكێ ل خانیێ مەدا بوو، چونكە جیرانەكێ مە مەنجلا ساڤاری هەلكربوو وی دەمی یێ فاما بووم و دەیكا من دەستێ من گرت و مە هەمیان پێكڤە قەستا ناڤ گورستانێ كر، و خویشكا من (مەیان) ل ملێ دەیكا من بوو و دەیكا من دوعا دكرن، و دو ساروخ ب مالا مە كەفت بوون و خانیێ دو قات بوو و ساروخەك ب ژوورا هێسترێ كەفت بوو، قاتێ خوارێ و ئەو ساروخ نە تەقی بوو و ئەم هاتینە گەرماڤا، و دوڤدا هاتینە دهۆكێ دەف خالێ خوە و خواندنا سەرەتایی ل دهۆكا نوی و ناڤنجییا ل ئاشتییا وی دەمی من خواند، ئانكو دناڤبەرا سالێن 1970 – 1974 مەكار دناڤ ئێكەتیا قوتابیان دا دكر و بەرپرسێن مە (عەبدولعزیز تەیب و محەمەد بانەسۆری) بوو، پشتی بەندێن رێكەفتنا 11ی ئادارێ نەهاتینە بجهئینان ژلایێ رژێمێ ڤە شەڕی دەسپێكر وی دەمی ل قۆناغا ناڤنجیێ بووم، پشتی ب دووماهی هاتنا قوناغا خواندنا یا بازرگانی و گەلەك جاران ژ پولێ دەرخستیمە و گۆتیە دڤێت ببیە حزبی و من گۆتێ كەسەكێ وەرزشڤانم و مایێ خوە دسیاسەتێ ناكەم، وی دەمی كابتنێ تیما نەوروز یا تەپاپێ بووم، و (سەربەستێ دێوالی ئاغای) سەرپەرشتێ مەبوو، و چار سالا بناڤێ دهۆكێ مە بۆ پەروەردا پارێزگەهێ یاری كریە، ل سالا 1979 هاتمە رێكخستن، برایێ من (عوزێر) بەرپرسێ پاراستنا ناڤخوە بوو و سەرپەرشتیا گەلەك شانێن رێكخستنێ بوو و دەمێ هاتیە دەستەسەركرن، گەلەك ئەشكەنجەدا و پاشی هاتە ڕەوانەكرن بۆ زیندانا كەركووكێ و ل دووف گۆتنا هەڤالێن وی دگۆتن ( گەلەك هاتە ئەشكەنجەدان و كارەبكرن و هەتا بێ ئاگەه دبوو و دبرە نەخوشخانێ و دزڤراند و هەر قوتا بەلێ وی كەسەك ئاشكرا نەدكر و هەر دگۆتێ كوردم)، گەلەك جارا برایێ من داخوازا كاغەزەكا سپی كریە كو ل سەر ئیمزا بكەت و سێدارە بدەن داكو ئەشكەنجەدانا وی بهێتە راوەستاندن، هەڤالێن وی ئەوێن رێكخستی هەمیان خوە ل تاخێ قەرەچان كومكر بوو، و هزر دكر برایێ من خوە ل بەر ئەشكەنجەدانێ نەگریت و ناڤا ئاشكرا بكەت، و ئەوا بەرهەڤی دكرن ژ دهۆكێ دەركەڤن، برایێ من ژ زیندانا كەركووكێ ئینا بوو مویسل و دوماهی جار دەمێ دایكا من و خێزانا برایێ من چووینە دەف ل وێرێ برایێ من گۆتێ دادێ ل سەر رێكا شەرەفێ دێ هێمە سێدارەدان، و هندەك وەسیەت گۆتنێ وی دەمی خێزانا وی یا ب دوگیان بوو، و گۆتێ ئەگەر كورەك بوو ناڤێ وی بكەنە (وەلید) ئەگەر كچ بوو ناڤێ وێ بكەنە ( كوردستان)، و برایێ من گۆتە دەیكا من ل دەمێ ڤەكولینێ دەمێ پرسیار ژ من دهاتنەكرن هندەكا پشت پەردێ خوە دانیاسین و گۆت ئەم فلان كەسین، و تەیا ئەڤ كارەیێ كری و ل گەل دروینشتین و تە بزاڤ دكرن مە بكەیە دناناڤا رێكخستنێ دا، و شاهدی ل سەر دا و رێككەفتی 24/2/1975 برایێ من هاتە سێدارە دان، پشتی سەرهلدانێ (تەحسینێ) برایێ من گەلەك ما ب دەیكا من ڤە ئەوان كەسا ئاشكرا بكەت ئەوێن شاهدی ل سەر برایێ من داین دەیكا من ئاشكرانەكرن، دەیكا من ژنەكا گەلەك دیندار بوو و برایێن وێ هەمی ملا بوون، و خەلكا گوندێ ئەلندكێ بوو، بۆچی برایێ من خواست ناڤێ كورێ وی بكەنە (وەلید) گۆتە دایكا من هەڤالەك ل گەل منە و خەلكێ زاخۆ یە و ناڤێ وی (وەلیدە) ئەڤ شەڤە ئەم هەر دو دێ هێینە سێدارەدان و ئەم گەلەك هەڤالێن ئێكین و حەز دكەم ناڤێ هەڤالێ خوە ڕاكەم، و هەڤالێن وی دگۆت شەڤا بریە سێدارێ گەلەك گازی دكر بژی بارزانی بژی كوردستان بژی پارتی.
رزگار كەمەكی، زێدەتر گۆت: دەمێ ئەم قوتابی چووینە ناڤ رێزێن شۆڕەشێ و ل چومان چەند جارا من بزاڤكر و چومە بارەگایێ بارزانی ل حاجی عومران لێ من رەحمەتی (ملا مستەفا بارزانی) نە دیت، و بتنێ من خودێ ژێ رازی(ئدریس بارزانی) دیت ل جهێ وی بوو، چونكە وی دەمی بارزانی هەر ل گەل پێشمەرگەی بووی و شەڕ دژوار ب بوو، و دوڤدا مە پولا سیێ ناڤنجی ب دووماهی ئینای و گۆتن هەرنە (دەربەندی ڕایات) چووین چەند رۆژەكان، و دوڤدا ژ بەركاودانان هاتە ڕاوستاندن، جارەكێ چوومە دەف سیدا(سالح یوسفی) بارەگایێ وی لبن چادرەكێ بوو و ژ من خواست كلاشینكوفەكێ هەلگرم و من گۆتێ قوتابی مە و دێ چمە خولەكێ و ڕەنگە وی ئاگەه ژ كاودانان هەبیت 6/3/ 1975 نسكۆ ب سەر مللەتێ كورد دا هات، بیرا منە هەمی بارەگا هاتنە بەردان و پێشمەرگە چوو و شۆڕەش نەما و فرۆكە هاتن توپ بارانكرن و ئەم نێزیكی سنوری بووین و بیرا من دهێت مە كەل و پەلێن خوە هەلگرتن و چووینە ناڤ ئاخا ئیرانێ، و چووینە (شنو)، و دوڤدا چووینە مالا بارزانی ل (نەغەدە) ئەم (25) قوتابی بووین و (18) رۆژا ئەم ماینە مالا (بارزانی) بۆ دیرۆك (دەیكا حەمایل) كادرەكا پێشكەفتی بوو، و چ بۆ ناهێـتە گۆتن و دهاتە دەف مە دگۆتن هوون كوڕێن منن كا چ ژ هەوەیێ كێمە؟ پرسیارا خارنا مە دكر و گەلەك چاڤێ خوە دامە، و دوڤدا بارەگایەك بۆ پێشمەرگەی و زگوردا ل (كەرمەنشاه) هاتەڤەكرن، وی دەمی هەر هێزەكێ بخوە تیمەكا تەپاپێ یا وەرزشی دروستكر و مە ژی بناڤێ هێزا دهۆك تیمەك دروستكر، وی دەمی برایێ من (تەحسین كەمەكی) ژ هێزا دهۆك هات و گەهشتە جەماعەتێن (عەلیێ خەلیل)، و هاتە ئیرانێ وی دەمی مالا (رەشید سەعید ئاغا) ل مهابادێ بوو و برایێ من گەهشتە مالا وان و من پێزانین ل سەر نەبوون، و من ب رێكا نامەكێ زانی برایێ من ل كیڤە یە و جارەكێ هاتە دەف من.
رزگاری گۆت: دەمێ برایێ من هاتیە سێدارەدان وی دەمی ئەم ل ئیرانێ بووین، و مە ئاگەه ژ بابەتی نەبوو، و هێزا دهۆك بابەت زانی بوو، و گۆتن ئەمنێ هەر دو جادێن مالا مە گرت بوون و نەدهێلان كەسەك بهێتە مالا مە و نەدهێلان تازی ژی بهێتەدانان.
