هەكە گەشتیارێن عەرەب نەهێن دێ رەوشا گەشتیاری ل دهۆكێ گەلەك لاواز بیت
زنار تۆڤی:
پرانیا گەشتیاران ل وەرزێ هاڤینێ قەستا جهێن گەشتیاری یێن پارێزگەها دهۆكێ دكەن، چونكی گەلەك جهێن گەشتیاری و هاڤینگەه ل پارێزگەها دهۆكێ هەنە و ئەڤە بوویە، ئەگەر سالانە ب ملیۆنەها گەشتیار سەرەدانا پارێزگەها دهۆكێ بكەن و ل دووڤ گۆتنا خودانێن جهێن گەشتیاری، ئەڤ سالە هاتنا گەشتیاران ژ سالا بوری باشترە.
جومعە ئەحمەد، سەرپەرشتیارێ شكەفتا ئینشكێ یا گەشتیاری بۆ رۆژناما ئەڤرۆ دیار كر: ل سالا بوری ل دەستپێكا وەرزێ هاڤینێ گەلەك گەشتیاران قەستا شكەفتا ئینشكێ دكر و هاتنا گەشتیاران گەلەك یا باشبوو، هەروەسا ل سالا بوری پتری 30 هزار گەشتیاران سەرەدانا شكەفتا ئینشكێ كرییە، ئەڤ سالە ژی هاتنا گەشتیاران گەلەك یا باشە و رۆژانە رێژەكا باش یا گرۆپێن گەشتیاری ژ هەموو دەڤەرێن عیراقێ و هەرێما كوردسانێ سەرەدانا شكەفتا ئینشكێ دكەن و دەمێن گەلەك خۆش لێ دبورینن.
ناڤهاتی گۆت ژی: هەر چەندە ئەو گرۆپێن گەشتیاری یێن دهێنە پارێزگەها دهۆكێ پتر حەز ژ وان جهان دكەن، یێن ئاڤ لێ هەیی، لەوما گەشتیار پتر دچنە وان جهان، رۆژێن ئەینی (1000 – 1500) گەشتیار سەرەدانا شكەفتا ئینشكێ دكەن، رۆژێن دیتر ژی (700 – 1000) گەشتیار دهێنە شكەفتا ئینشكێ و جاران ژی پتر ژ ڤێ رێژێ دهێن، ئەو گەشتیارێن دهێن ژی پرانیا وان عەرەبن و خەلكێ ناڤەراست و ژوورییا عێراقێ نە، هەر چەندە خەلكێ مە ژی دهێت، بەلێ نە ب رێژەكا مەزن، هەكە عەرەب نەهێن دێ رەوشا گەشتیاری ل دهۆكێ.
زێدەتر گۆت: ب رەنگەكێ گشتی گەلەك لاواز بیت، دیسان گەشتیار ژ وەلاتێ توركیا و ئیرانێ ژی دهێن، بەلێ ب رێژەكا كێم، هەروەسا ئەڤ سالە رێژا هاتنا گەشتیاران گەلەك ژ سالا بوری باشترە، هەكە ب ڤی رەنگێ نوكە هاتنا وان یا بەردەوام بیت، دێ گەلەك ژ سالا 2022 ێ، پتر بیت و ئەم ژی گەلەك ب رەنگەكێ باش خزمەتا گەشتیاران دكەین، دیسان ئەم دخوازین رێك و رێوبار بهێنە بەرفرەهكرن، هەر چەندە حكومەتێ و جهێن شۆلەژێ گەلەك پشتەڤانی ل كەرتێ گەشتیاری كرییە و ئەڤە بوویە ئەگەر گەشتیار قەستا جهێن مە یێن گەشتیاری بكەن.
