هەلامەتێن ئاگری
نایف مەحموود
د بوهارا ژیێ خوەدا
فرمێسكێن ئاسمانی
دڕژن سەر كەلەخێن ساخ و نەڤەشارتی..
ل كومتێن چیا و سەرێن شاخ و زنازان،
دەنگێن ئەوران، قڕێنا ئەسمانان دبیتە ئاوازەك،
ترسا زڤستانەك سار و دژوار
د گوهێن عەردیدا دڤەژینیت و
هەلامەتێن ئاگری ژ سینگێ ڕوژێ
دپەشن،..؟
سەرێن كولیلك و گولێن بوهارێ
ژ بەژنا بلنداهی و جوانیێ د كەڤن و دسوژن!
تێهنا ئێتونەك قەمخی كەفتیە تیڤلێ عەردی
و هشێنا لەهی و توفانان پێلێن دەریایان ئازراندن،
بوونە زڤڕوك و سیپەلێن هار و ئاریای
هەمی باهۆز و حنگ و زەڤلەكێن ئەژدەهایان تێك وەركرن!
ژ نشكەكێ ڤە مرۆڤاتی ب سەر و شكلێن خو یێن پیرو پوسیدەڤە
كەفتە سەر لنگێن خۆ یێن شكەستی،
ژ وێ پاویزا كفنێ مرنێ ل قڕكا
گول و گولزار و بێهنا بوهارا مە كری،
ژ وێ خوها ماندیبونا ئەنیا ڕوژا مە تەڕكری، ماچی كری…
هێشتا پەل وبزوتێن ئاگری نەبوین خوەلی، نە تەزین و تێهنا دوژەها خۆ
ل سەر لاشێن مە مرۆڤان سار نەكری
سوبەیەك دی كارێ خۆ كر
ئەلندا نوی ژ ترسا كین و غوبارێ
ڕوندكێن خۆ نەڤەشارتن
سەرو ژنوی بەردا گری!
ئەڤ ڕوندكە بوونە گازی و بوونە هەوار
ب سەر ڕوكێن وی زاڕوكێ ژنوی ژدایك بووی
وی زاڤایێ شەڤا ئێكێ، ل سپێدا زوی ژ خەو ڕابووی، هێشتا كارێ خۆ نە كری،
بوونە تاڤی و ئاڤ و خویسار…ئاڤ و خویسار.
