هەلبژارتن، نەك ب تنێ دەنگدانە; بەلكو هەژموونا هزری و نیشتیمانیا تە یە
ئازاد عومەر
هەلبژارتن، د فەلسەفا سیاسەتا نوو دا، پێنگاڤەكە بەر ب پەیوەندیكرنا خەلكی ب تۆخمێن دەسهەلاتێ ڤە، ئانكو دروستكرنا پرەكا هەڤسۆزی و دلینییێ د ناڤبەرا خەلكی دا وەك ئارمانجەكا سەرەكی، نیكولا ماكیاڤێلی د پەرتووكا ‹ میر ‹ دا دگۆت: یێ دەسهەلاتێ بخوازیت، دڤێت د وەرگرتنا دەنگ و هەستێن خەلكی دا ژیر و زانا بیت، ب شێوەیەكی كریاری ئانكو (خزمەت)، ژ بەر ئەڤێ چەندێ هەلبژارتن ب تنێ پڕۆسەیەكا دیموكراسی نینە، بەلكو پرۆسەیەكا فەلسەفی یە، ژ سەردەمێ دروستبوونا پارتی تا نهۆ، د هەردو بەریێن سار و گەرم دا، ژ خەباتا چیایی و مەدەنی دا، ل چییایان و ل گوند باژێران، شوین دەستێن ئەڤێ پارتێ دیارن، خزمەتەك وەك ئامانج و پڕۆسە ب شێوەیەكێ دوور مەودا، ب ئەڤێ چەندێ پارتی شییایە پەیوەندیەكا ب هێزا عەردی و ئەخلاقی دروست بكەت د ناڤبەرا هێز و مێژوویێ دا، ژ چل و شەشێ تا نهۆ بەلگەیە ل سەر خۆڕاگری و خۆ نەچەماندنێ، پارتی ژ بلی هەژموونا هزری و مەدەنی، ئەم دشێن بێژین ئێدیەمەكا نیشتیمان پەروەری و مێژوویی یە، ل گۆڕەیی خۆدیكا من یا هزری، ئەو كەسێ دەنگ ب پارتی ددەت، هەمان ئەو دەنگێ مێژوویی یێ وێ پاشخانا سەربەرزییا نەتەوەیی یە، ژ بەركو ئەوێ دەسهەلاتێ بخوازیت، دڤێت مێژووییا خوە بخوینت و بزانیت، چونكی مێژوو ئێكەم قوتابخانا دەسهەلاتێ یە، مێژوویا پارتی تژییە ژ بەلگەیێن خوە گۆریكرنا ب هزاران قەهرەمان و سەربەرزێن ئەڤێ ئاخێ، تژییە ژ ئیلۆن و گولانان، پارتی ئەو خەیالا نیشتیمانی یا مەزن كو خەونا پێنجی ملیۆن كوردانە، ل بەر سینگێ خوە و د هەمبێزا خوە دا حەواندیە، وەكی زاڕۆیەكێ زاڤا هێدی هێدی ل گەل خوە مەزنكریە، پارتی تاكە هێزە ل دویڤ گازیا خانی چوویی و هەمان ئەو دەنگێ خانی بۆ میرێن كوردان هنارتین كو وێ پڕسیارا جەوهەری بكن، و ل دویڤ وێ رێكێ بچن كا بۆچی (بلجوملە ژ بۆ چ بوونە مەحكوم)؛ ئەو مەحرومییا خانی بەحس دكر ژ ئاخ و ئاڤ و نانی، ئەڤرۆ هەمان دەنگ ل ئیراقێ پارتی گازیا مەحرومییا مافێن دەستوورێن كوردان دكەن، دەنگدان ب پارتی دەنگدانە ب ڕێباز و دۆزەكا كوردی نەك پارتەكێ، دەنگدانە ب پڕۆسەیا گوهۆڕینەكا جەوهەری ل سەر ئاخا دەڤەرێ، دەنگدان ب پارتی دەنگدانە ب وێ ڕێبازا شیای دەستكەفتێ ئارامی و هەڤسەنگیێ دروست بكەت كو د مێژوویا كوردان و بابكالكێن وان دا ژ سەردەمێ مێدییان تا نهۆ ئەو جۆرێ ئازادیێ، ئەو قەوارەیێ سەربەخۆ و بهێز چێنەبووی، لەورا دەنگدان ب پارتی دەنگدانە ب بەردەوامیا كاروانێ وێ هێزێ و بەرفرەهكرنا مەودایێ وێ، هەتا دگەهیتە وێ ئارمانجێ یا كو خەونا هەمی كوردانە، دەنگدان ب پارتی ب هێزكرنا بەرەیەكێ نەتەوەیی و نیشتیمانی یە یا د چ قەیران و گڤاشتن و تیرۆر و جەنگان دا پشت نەدای مللەتێ خوە، پارتی دەنگێ مللەتی یە، دەنگدان ب پارتی دەنگدانا ب كەرامەت و ماف و ئازادی و سەربەخۆییا مە.
