هەلبژارتنێن ڤێجارێ ل تورکیا دێ گەلەک د جودا بن
ئەڤرۆ
ب، سه‌رجان مەحمود:
رۆژنامەیەکا ئەلمانی دیار دکەت، رەوشا ساخلەمیێ یا ئەردۆغانی باش نینە، ژ بەر هندێ ژی ئەو یەک دێ کاریگەریا خوە ل دەنگدەرێن هەڤپەیمانیا جمهور کەت، ل ئالیێ دی رێژا پشتەڤانیا وەلاتیێن تورکیا بۆ کەمال کلچدار ئوغلۆی د زێدە بوونێ دایە، ژ بەر هندێ ژی هەلبژارتنێن ڤێجارێ ل تورکیا دێ جودا بن.
رۆژنامەیا بیلد یا ئه‌لمانیا راپۆرته‌کا تایبه‌ت ل دۆر هه‌لبژارتنێن تورکیا به‌لاڤکر، د راپۆرتێ دا دهێته دیار کرن کو ره‌وشا ساخلەمیێ یا ئه‌ردۆغانی باشه نینە، ژ به‌ر ڤێ یه‌کێ نه‌شێت ده‌رکه‌ڤیته مه‌یدانان و د سیمایێ وی دا دیاره کو نه‌ساخیا وی یا گرانە، ل هه‌مبه‌ر دا که‌مال کلچدار ئوغلۆ ب مورالەکا بلند داکه‌فتیه مه‌یدانێ و رۆژ ب رۆژێ ده‌نگێن خوه ل هه‌مبه‌ر ئه‌ردۆغانی زێده‌تر دکه‌ت و ئه‌ردۆغان د وارێ سیاسه‌ت و ساخلەمیێ دا به‌ر ب شکه‌ستنێ ڤه دچیت. ئەو یەک ژی نیشا ددەت هەلبژارتنێن ڤێجارێ ل تورکیا دێ گەلەک جوداتر بن ژ هەلبژارتنێن بیست سالێن بۆری.
رۆژناما ناڤهاتی هه‌روه‌سا د راپۆرتا خوه دا ئاشکرا ژی کریە، کو ل دووڤ ئه‌نجامێن پرانیا کۆمپانیێن راپرسیان ژ به‌ر سێ ئه‌گه‌ران ده‌نگێ ئه‌ردۆغانی گه‌له‌ک کێم بوویه و وان ئه‌گه‌ران وه‌سا رێز دکه‌ت. یا ده‌ستپێکێ ره‌وشا ئابووریێ یه، تورکیا د وارێ ئابووری دا که‌فتیە قۆناغه‌کا گه‌له‌ک دژوار، پرانیا خه‌لکێ نەشێن پێدڤیاتێن رۆژانە یێ ژیانا بۆ خوە دابین بکەن، بێکاری گەهشتیه ئاستەکێ مەترسیدار. یا دویێ سیاسه‌تا ناڤخوه و یا ده‌رڤه یا تورکیا و یا سێیه‌م ژی بابەتێ گه‌نده‌لیێ و نه‌مانا دادوه‌ریێ و دیموکراسیێ یه، ئه‌ڤ هه‌ر سێ خالێن گرنگ ژی بووینە ئەگەرێ هندێ ده‌نگێن ئه‌ردۆغانی ل هه‌مبه‌ر که‌مال کلچدارئوغلۆی به‌ربژارێ سه‌رۆک کۆماریێ یێ ئۆپۆزسیۆنێ کێمتر ببن و پرانیا وه‌لاتیێن تورکیا دخوازن کو ئێدی ده‌ستهه‌لات بهێته گوهۆرین.
د دووماهیا راپۆرتا رۆژناما بیلد یا ئەلمانی دا دهێته دیار کرن، راپرسیێن هەتا نها ل تورکیا هاتینە کرن نیشا ددەن رەوشا ئەردۆغانێ ڤێجارێ یا باش نینە، د هەلبژارتنێن بیست سالێن بۆری دا ئەردۆغان شیا گەلەک کارتان د بەرژەوەندیا خوە دا بکار بینیت و د ناڤخوەیێ تورکیا دا ژی ئۆپۆزسیۆنەکا وەسا بهێز نەبوو، لێ ڤێجارێ رەوش ب تەمامی هاتیە گوهۆرین، باوەریا خەلکی ب ئەردۆغانی و سۆزێن وی نەماینە، خەلکی گوهۆرین دڤێت، لێ ئەردۆغان و ئاکپارتی نەشێن چو گوهۆرینان بکەن.
ل ئالیێ دی سەرۆک کۆمارێ تورکیا رەجەب تەیب ئەردۆغان ژی بەری دو رۆژان د داخۆیانیەکێ دا راگەهاند، راپرسیێن هەتا نها ل تورکیا نیشا ددەن رەوشا وی و هەڤپەیمانیا جمهور گەلەک یا باشە و گۆت: (د ئاستێ ناڤخوەیی و دەرڤە دا گەلەک هێز ل دژی مە کار دکەن، لێ گەلێ تورکیا باش دزانیت کو ئاکپارتیێ هەتا نها چەند خزمەتا تورکیا کریە، پێدڤیا تورکیا ب ئاکپارتیێ هەیە، ژ بەر هندی ژی هێزێن ئۆپۆزسیۆنێ نەشێن ئاکپارتیێ تووشی شکەستنێ بکەن و دێ دیسان سەرکەفتن بارا ئاکپارتیێ و هەڤپەیمانیا جمهور بیت).
