هەلبژارتن دێ بنە ئەگەرێ قەیرانەکا دی ل سووریێ
بەرپرسەکێ رێڤەبەریا خوەسەر دیار دکەت، هەلبژارتنێن ل سووریێ هاتنە کرن چو رەواتیا خوە نابن، چونکی هەلبژارتن ل دەڤەرێن کوردی و هەروەسا ل سوەیدایێ ژی نەهاتینە کرن و دەستهەلاتێ دڤێت رەواتیێ بۆ خوە پەیدا بکەت، لێ سووریێ دێ تووشی قەیرانەکا مەزن بیت.
بەدران چیا کورد ئێک ژ بەرپرسێن رێڤەبەریا خوە یا رۆژئاڤایێ کوردستانێ دیار کر، دەستهەلاتا نها یا سووریێ دڤێت رەواتیێ بدەتە خوە و پشتەڤانیێ بۆ خوە ل ئاستێ هەرێمی و جیهانی پەیدا بکەت، ژ بەر ڤێ یەکێ ژی هەلبژارتن د رەوشەکا نە ئاسایی دا هاتنە کرن، چو بەرهەڤی بۆ هەلبژارتنان نەهاتنە کرن، ژ بەر فشارێن تورکیا و هندەک وەلاتان دەستهەلاتا نها یا شامێ هەلبژارتن ساز کرن و ئەو پەرلەمانێ کو بهێتە ئاڤا کرن ژی نوونەراتیا خەلکێ سووریێ ناکەت و گۆت: (هەلبژارتن ل دەڤەرێن رێڤەبەریا خوەسەر و سوەیدایێ نەهاتنە کرن، کورد و عەرەب و گەلەک پێکهاتەیێن دی ل دەڤەرێن ژێر کۆنترۆلا رێڤەبەریا خوەسەر دا ژین وان ژی پشکداری د هەلبژارتنان دا نەکرینە و هەروەسا ل سوەیدایێ ژی، ئانکو یا نها دەستهەلاتا شامێ کری ب رەنگەکێ ژ رەنگان پارچەکرنا سووریێ یە، ژ بەر ڤێ یەکێ ژی ئەم دبێژین هەلبژارتنێن ل سووریێ چو رەواتیا خوە نینن و دێ بنە ئەگەرێ قەیرانەکا دی یا دژوار ل سووریێ).
ناڤهاتی ئەو یەک ژی دیار کر، وان بەری نها چەندین جاران داخواز ژ شامێ کرینە کو ب رێیا دانوستاندنان هەموو پرسێن هەی چارەسەر بکەن، لێ بەرپرسێن شامێ بەرهەڤ نەبوون ل گەل رێڤەبەریا خوەسەر و کوردان دانوستاندنان بکەن، هەر جارێ بەهانەیەکا وان هەبوو، دانوستاندنێن ل پاریسێ دا بنە ئەگەرێ دەستپێکەکا نوو بۆ هەموو سووریێ، لێ ژ بەر گەف و فشارێن تورکیا دەستهەلاتا شامێ ژی خوە ژ دانوستاندنان ڤەکێشا و ژ بەر ڤێ یەکێ ژی رەوش ئالۆزتر لێ هات و گۆت: (هەکە ئەحمەد شەرع و کەسێن نێزیکی وی وەسا هزر بکەن دێ شێن ب ئۆپەراسیۆنێن سەربازی رێڤەبەریا خوەسەر ژناڤ بەن ئەو گەلەک د شاشن، چونکی یێن گەلەک بهێزتر ژ وان بەری نها بزاڤا لاوازکرنا کوردان دان لێ تووشێ شکەستنێن مەزن هاتن).
وی بەرپرسێ کورد ئەو یەک ژی دیار کر، ئەڤرۆکە نەبیت ژی سوباهی شام یا نەچارە ل گەل کوردان دەست ب دانوستاندنان بکەت، بێی کوردان چو حوکمەتەک ل سووریێ نەشێت یا سەرکەفتی بیت، ئەحمەد شەرع و یێن دی ژی ڤێ یەکێ باش دزانن.
