هەلبژارتیێ پارێزگەهێ رێزا سێیێ ب دەستڤەئینا
تیما هەلبژارتیێ پارێزگەها دهۆكێ بۆ یارییا باسكێت بۆلێ رێزا سێیێ ب دەستڤە ئینا د چارچووڤێ قارەمانییا ئیراقێ دا ئەوا ل سەر ئاستێ كچان یا 3*3 ب پشكدارییا 12 هەلبژارتیێن پارێزگەهێن ئیراقێ و كوردستانێ ل پایتەختێ ئیراقێ بەغدا هاتییە كرن.
شێوازێ قارەمانیێ بۆ چار كۆما و هەر كۆمەكێ سێ هەلبژارتی هاتبوونە بەلاڤكرن، تیما پارێزگەهێ د كۆما چارێ دا بوو شیابوو سەركەفتنێ ل سەر هەر ئێك ژ كەركووك 21 خالان بێ بەرانبەر، و دیالا 17-8 خالان، د قۆناغا چارێك دووماهیێ دا ب سەركەفت ل سەر بابل ب17 بەرانبەر سێ خالان، لێ د یاریا پێش دووماهیێ دا تووشی خوسارەتیێ بوو دگەل هەلبژارتیێ سلێمانیێ، ب ئەنجامێ گشتی تیما هەلبژارتیێ پارێزگەها دهۆكێ رێزا سێیێ هات، ئەوا هەلبژارتیێ سلێمانیێ رێزا ئێكێ دەستڤە ئینایی و هەولێرێ رێزا دویێ هاتی.
داوود رەبەن سەرۆك شاندێ هەلبژارتیێ پارێزگەها دهۆكێ بۆ رۆژنامەیا ئەڤرۆ گۆت: هەلبژارتیێ دهۆكێ ب كچێن یانەیا سەنحاریب پشكداری كربوو، هەرچەندە ئارمانجا مە دەستڤە ئینانا ناسناڤی بوو، لێ سیستەمێ قارەمانیێ كارتیكرن ل سەر مە كر، هەرچەوابیت ل سەر ئاستێ ئیراقێ و پشكدارییا 12 هەلبژارتییان و ئەو كاودانێن كەفتینە د رێكێ دا ئەنجامەكێ باشە، دەستخووشیا تیما هەلبژارتیێ پارێزگەها خوە دكەین بۆ داهاتی دێ باشتر بن.
