هەلبژارتیێ پارێزگەهێ چو ئارمانجێن دەربازبوونێ نەماینە
چاڤەڕێ دهێتە كرن سوباهی تیما هەلبژارتیێ پارێزگەها دهۆكێ دێ كاروانێ خوە د هەڤڕكیێن قارەمانییا ئیراقێ یا تەپا پێی ب دووماهی ئینت و چو ئارمانجێن دەربازبوونێ نەماینە، دەمێ ل یاریگەها زانكو ل باژێرێ سلێمانیێ ببیتە مێڤانا هەلبژارتیێ پارێزگەها سلێمانیێ ئەوا دێ ل دەمژمێر 4:30 ئێڤاری ژ چارچووڤێ یارییا سێیێ ژ كۆما هەرێما كوردستانێ دەربازبوون بۆ قۆناغا دووماهیێ هێتە كرن.
تیما دهۆكێ هیڤیێن دەربازبوونێ ژ دەستداینە پشتی دو خوسارەتیێن گران ل سەر دەستێ هەلبژارتیێ هەولێرێ 4-1 و دگەل هەلبژارتێی كەركووكێ چار گۆلان بێ بەرانبەر، یارییا سوباهی چو گوهۆڕینێ د هەلوەستێ هەلبژارتیێ دهۆكێ بۆ دەربازبوونێ ناكەت، ژبەركو هەرسێ هەلبژارتیێن هەولێر، سلێمانی و كەركووك هەر ئێك چار خال هەنە و دهۆكێ چو خال نینن.
د داخویانیەكێ دا راهێنەرێ هەلبژارتیێ دهۆكێ بەناڤ ئەحمەد بۆ رۆژنامەیا ئەڤرۆ دیار كر بەرهەڤیێن تیما وی بۆ قارەمانیێ د باش نەبووینە و یاریزان بێ مۆرالن ئانكو چو هیڤیێن سەركەفتنێ ل دەڤ نینن و دیسان چەند یاریزانێن باش نە هاتینە دناڤ رێزێن تیمێ دا، هەروەسان پشككێشان د بەرژوەندییا هەلبژارتیێن دی دابوون و ئەم زەرەرمەند بووین، بۆ ڤێ یاریێ پێشبینی دكەم هەمی یاریزان بەرهەڤ نەبن، هەروەسان مە هیڤی و ئۆمێد نەماینە ئەڤچار یارییەكا ب هەڤڕكی نابیت و گڤاشتن ل سەر یاریزانی ژی نابیت.
بۆ زانین 16 هەلبژارتیێن پارێزگەهان پشكداری د قارەمانیێ دا كرییە و هاتینە بەلاڤكرن ل سەر چار كۆمان ل دووڤ دەڤەرێن جودا، هەلبژارتیێ دهۆكێ بۆ جارا ئێكێ یە پشتی 33 سالان پشكداری قارەمانیێ بوویە و دكۆما دەڤەرا هەرێما كوردستانێ دایە ئەوا هەلبژارتیێن هەولێر، سلێمانی و كەركووك ژی تێدا، یاریێن وێ ب شێوەی خول ئێك قۆناغ دو هەلبژارتی دەربازدبنە قۆناغا دووماهیێ.
