هەلبەستەك ب سێدارێ ڤە
عزەت یوسف
هەلبەستەك ب سێدارێ ڤە، ناڤونیشانێ هەلبەستەكا هەلبەستڤان (موئەییەد تەیب)ە، د پەرتۆكا (زەڤیەكا سەرابێ ئاڤدای .. هەلامەت لێ شین دبن)، د بەرپەرێ 29 دا وەك هەستەك مەست ژ وەفاداری بۆ گیانێ شەهیدێ قوتابی (نایف عبدالرحمن ئێمینكی) نڤێسیە.
شەهید نایف و هەلبەستڤان موئەیەد تەیب ل ئامادەییا كاوە پێكڤە قوتابی بوون، وەسا دیارە شەهیدی ژی هەلبەست دنڤێسین، لێ هەلبەستێن خۆ نیشا كەسێ نەددان. رژێما بەعس ل 27/7/1977 ل زیندارا ئەبو غرێب ل سێدارە دا و تەرمێ وی یێ پیرۆز ژی رادەستی خۆدانا نەكر.
هەلبەست دبێژیت:
(وەك شلخەكا زركێتكێن ئازری
ب كۆلان و بانێن تاخا مە وەر بوون)
ئانكو رەشەكێن رژێما بەعس ئازریا بوون، هار ببوون، پشتی نیڤا شەڤێ ب سەر تاخێ شەهید لێ ڤەشارتی دا گرت و ب سەر بان و بەربانا كەتن و سەرێ رێ و كولانا گرتن.
(د گاڤێن وان دا، سەهم
د چاڤێن وان دا مرن)
چ جهەكێ ئەڤان رەشەكا بەرێ خۆ دابایێ مرن لێ دباری، چ گاڤ نەدهاڤێتن بێ بەلاخازی، جهێ چووبانێ ترس و لەرز دكەتێ، چاڤێن وان سۆر سۆر خوین ژێ دباری.
(ل چ دگەڕن؟
كەس نزانت
ل كێ دگەڕن
كەس نزانت)
ئەڤ رەشەكە، ئەڤ كومباخە، ڤێ نیڤا شەڤێ ل چ دگەڕن ل كێ دگەڕن؟ بەس ئەو دزانن، یێ ل گەنجەكێ كوردێ ب گیانێ كوردایەتیێ فرشك بووی و هاتیە پەروەردە كرن دگەڕن.
(خۆ ڤەشێرن
وی خۆ دناڤ رێزێن هەلبەستەكا خۆ دا
ڤەشارت
نەدزانی
ئەو یێ ل وێ هەلبەستێ دگەڕن)
شەهید نایفی ژی خۆ ل مالەكا وی تاخی ڤەشارت، دیارە خودان هەلبەست بوویە، هەلبەستێن نیشتمانی، لێ ئەڤ رەشەكە دژی هەر هزرەكا نیشتمانی نە، رەشەك ل هەلبەستێ وخودانێ هەلبەستێ دگەڕیان.
(هەلبەست
د خەودا گرتن
سێ هەیڤا
رێز، رێز
پەیڤ، پەیڤ
تیپ، تیپ
ئەشكەنجەدان و
د خوینێ وەركرن).
هەلبەست هەر بخۆە نایفە، كوردە، شۆرەشە، نایف د خەوداگرت، راخڕاندنە زیندانێ، سێ هەیڤا سەرئێك كەتە بەر لێدان و ئەشكەنجەدانێ.
(بەری سپێدەیەكێ
ب سێدارێ ڤە كرن
هەلبەست و نایف
پێكڤە مرن
نە هەلبەست
چوو سەر چ كاغەز و دەفتەرا
نە تەرمێ وی
گەهشتە كۆرا شمك زەرا)
پاش سێ مەهان ژ ئەشكەنجەدانێ د زیندانا دا، سپێدەكا زوی بەری رۆژ ب هەلێتن نایف ل سێدارێ دان و تەرمێ وی یێ پیرۆز ژی رادەستی خودانا نەكرن، هەلبەستێن وی ژی خۆدێ دزانت ل بن كیژ دار بەڕیا سەرەگەڤرێ، یان شەقە بەرەكێ چیایێ سەرگەشێ مام سینی بەرزە بوون، وەسا نە نایف ما نە هەلبەست، نە چ كاغەز و پەرتۆكا هەلبەستێن وی هەمبێز كرن و نە گۆرستانا شمكزەرا پێشوازی ل تەرمێ وی كر.
(كۆرا شمكزەرا!
ئەی كۆرا خەمگین و هێمن
تۆ دزانی
چەند كێلی ژ
گۆڕسانا تە دكێمن؟!)
هەلبەستڤان ل ڤێرە پرسیارا خۆ ئارەستەی كۆرا شمكزەرا دكەت كا چەند كێلی ژ گۆڕستانا وێ دكێمن، كێلیێن سەدان ژ شەهید و جانگۆریێن مینا شەهید نایفی، كو رژێما زۆردار و ستەمكار رادەستی خودانا نەكرینە و ب رێز و پیرۆزی نەهاتینە ڤەشارتن. بێگۆمان كۆرا شمكزەرا نەزانی بەرسڤێ بدەت، چونكی گەلەكن! بەلێ ئێكجار گەلەكن!.
