هەلگرێن پاسپورتێن ئیرانی ل دەرگەهێ ئیبراهیم خەلیل دهێنە ڤەگەراندن
ئەڤرۆ نیوز عەلی حاجی :
رێڤەبەرێ ئاسایشا ئیبراهیم خەلیل د داخویانیەکێ دا بۆ ئەڤرۆ نیوز دیار کر هەلگرێن پاسەپورتێن ئیرانی کو دخازن ب رێیا وەلاتێ تورکیا بهێنە کوردستانێ دهێنە ڤەگەراندنەڤە بۆ وەلاتێ تورکیا.
زێدەتر عەبدلوەهاب محەمەدی گوت: (پشتی ڤایروسێ کورونا گەهشتیە وەلاتێ ئیرانێ و ب مەرەما رێگریکرن ل وی ڤایروسی د نوکە دا هەر هاولاتیەکێ هەلگرێ پاسەپورتا ئیرانی ب رێیا دەرگەهێ وەلاتێ تورکیا بهێتە دناڤ دەریێ سنوریێ ئیبراهیم خەلیل تیمێن مە رێکێ ب وان هاولاتیان نادەن بهێنە دناڤ ئاخا هەرێما کوردستانێ دا و دوبارە دهێنە ڤەگەراندن بۆ وی جهێ ژێ هاتی دا کو ژ مەترسیا بەلاڤ بونا وی ڤایروسی د ناڤ کوردستانێ دا دویر بین،هەر دیسان هەر هاولاتیەکێ دیتر ژی قەستا وەلاتێ ئیرانێ کربیت د دەمێ بوری دا و ب رێیا دەرگەهێ ئیبراهیم خەلیل بهێتە دناڤ کوردستانێ دا ئەو کەسە لێپرسین ل دەریێ سنوری دا دگەل دهێتە کرن و دهێنە پشکنین کرن ژی دا کو ئاشکەرا بیت ئەو کەسە هەلگرێ ڤایروسێ کورونایە یان ژی نە.)
و گوت ژی ئەم دێ بەردەوامین چاڤدێریا ڤێ چەندێ کەین دا کو رێگری ل بەر بەلاڤبوونا ڤێ ڤایروسی بکەین ل کوردستانێ و هەر دیسان سنورێن خوە باشتر کونترول بکەین ژ وان وەلاتێن ڤایروسێ کورونا لێ هاتینە تومار کرن.
