هەمبێزا ئاخێ دەستپێکەکا نوی یا هەبوونێ
سوسمان عومەر ئەحمەد
ڕۆژەکا پڕی ماندیبوونە، دەریایەکا خەمان د چاڤێن ژیندایێ دا دیاردبوو، بەردەوام خەیال د هزرا خوەدا د ئازراندن داکو بگەهیتە ئەوان خەیالێن بێ وێنە، ئەو خەیالێن د دەستێن خەلکێدا هاتینە گڤاشتن! ب پێنوسێ خوە ل سەر بەرپەڕەکێ نڤیسی، بۆ بارا پتریا زارۆکان مال جهێ خەون و خەیالانە هەروەسا جهێ خوەشی و نەخوەشیانە، دەمەکێ خوەش تێدا دبۆرینن وەکی یاریکرنێ و… ژۆر ئەو مالکا جهێ ئارامییێ، لێ بۆ ئەوێ ببوو هێلینا خەم و ئازاران. هەر ڕۆژ وەکی بەلاتینکان ئەوێ هەمی گولێن باخچەیێ خوە هەمبێز دکرن، د هەمی شەڤێن تاری دا بارێ خوە یێ هزاران دناڤ بابەلیسکا شەڤێن تاری دا دنڤینیت، د ناخێ خوەدا دگۆت: بۆچی ژیانێ بارێ خوە دەیناتیە ل سەر ملێن من؟ ژیان، ما ئەز ژ هەژی ژیانەکا خوەشتر نینم؟!
ژیندا ل ڕۆژەکا وەکی بەختێ ئەوێ یێ ڕەش پشتی ژ فرۆتنا کلینسان ب دویماهی هاتی ب چلكێن کەڤن و گریەکا گەرم دیسان قەستا باخچەیێ گولانکر، خەون و خەیالێن خوە دناڤ باخچەیێ گولان دا بەرزەکرن، هەتاڤ خەمگین بوو، ڕۆندکێن ئەسمانی ب سەر چاڤێن ئەردی دهاتنە خوارێ، ژیندا بۆ گولێن باخچەیێ خوە چووبوو هەڤپەیڤینێ و دگۆت: ئەو زارۆكێن ب مالا خوەڤە گرێدای و مالا ئەوان حەزژێدكەن، دنیا بۆ ئەوان وەكی خەمل و جوانییا هەوە برێڤە دچیت، وەكی گولان شین و گەش دبن، بەلێ ئەو مالێن حەز ژ زارۆكێن خوە نەكەن، دنیا بۆ ئەوان زارۆکان ژەهرە، وەکی ئەوێ گولا د باخچەیەکێ دا ب نەچاری سەرێ خوە بلندکری و چ کەسان چپکەکا ئاڤێ ژی نەداییێ و ژ خەمان دا چرمسی و وەغەرکری. مانە مخابن تو گولێن باخچەیێ خوە ئاڤنەدەی! یا جهێ گۆمانێ ئەوە؛ بۆچی تە ئەو گول چاندینە داکو کەسێن دی ئاڤبدەن یان داکو زەر ببن و ژ نەچاری ب وەرن..!
ئاخ .. ئاخ ناخێ من، دەنگێ تە د گوهێن من یێن بێ گونەهە دا چەندێ بێ دەنگە! ئەڤا من بۆ تە گۆتی پشکەکە ژ یا من بۆ تە نە گۆتی؛ چونکی هەر شەڤ خەیالەکا من بەرەڤ ئەسمانی دهێتە فڕین، ئەسمانی هندەک جاران ژبەر خەم و ژانێن من دکەتە گری و هندەک جاران دکەتە هاوار و گازی!
ببۆرینا سالان.. ژیندا مەزن دبیت، بەلێ مەزنبوون تابلۆیەک بوو، چ ژ ئەوان ڕەنگان تێدا نەبوون یێن ژیندایێ ل زارۆکینیێ خەون پێڤە دیتین، بتنێ خەونا ئەوێ ئەو بوو، د ناڤ ئەوێ تابلۆیێ دا ئەوێ باخچەیەک هەبیت و د ناڤ ئەوی باخچەیی دا د هەمبێزا گولێن باخچەی دا بیت بۆ هەتا هەتایێ؛ دا دەنگێ با و بارۆڤەیان نەگەهیتە گوهێن ئەوێ! بەلێ ژیانێ یاری ب خەم و ژانێن ئەوێ دکر، ئازار و نەخوەشی د مێشکێ ئەوێ دا چکلاندبوون، ل سەر ئەڤان ئاستەنگانڕا هیڤیێن ژیانێ هەبوون بۆ بژیت و دبوونە هاریکار بۆ سەرکەفتنێ، لەوڕا بڕیارێ ددەت هەڤڕکییا ژیانێ بکەت و بەرەڤ جیهانەکا دیتر بچیت، هندابوونەکا بێ ڕاوەستیان دناڤ ئەوێ جیهانێ دا، پێنگاڤ ل گەل ئێش و تۆزا ڕێکێ تێکەل دبوون.
ڕۆژ دناڤ جەرگێ ئەسمانی دا دەردکەڤیت، ژیندا یا چەلەنگ بریارێ ددەت پشكداری بەریکانەیەکا نیڤ دەولەتی ببیت، ب دەستێن وەستیایی و ب ناخەکێ دەرزی تابلۆیەکێ دروستدکەت، دناڤ تابلۆیا خوەدا ئەو باخچەڤانەکا چەلەنگە، ئەوان خەیالێن چەندین سالان دناڤ باخچەیێ ئەوێ دا بەرزەبووین دناڤ ئەوێ تابلۆیێ دا هاتنە ڤەدیتن، ئەو تابلۆ ب باخچەیێ ڤیانێ هاتە بناڤکرن؛ چونکی ئەو گۆل ل باخچەیێ ناخێ ئەوێ دا هاتبوونە چاندن، ئەو گول نە دهێنە فرۆتن و نە ژی دهێنە کرین، حەزژێکرنەکا بێ دویماهیک هەبوو بۆ تشتێن نەهێنە کرین و فرۆتن وەکی؛ ڤیانێ، ئەسمانی، ڕۆژێ، هەیڤێ، باران و کانیکێن زەلال. پشتی ژ هەڤڕکییێ ب دویماهی هاتی خەلاتێ باشترین وێنەکێش بدەستخوەڤەئینات و دوبارە ئەو گول د ناخێ ئەوێ دا گەش بوون، لێ ئەڤ جارە ب ئاڤدانا خوینەکا سۆر، ئەو گول بوونە هەناسەیەکا کویر بۆ ژیندایێ، ئەو هەناسە ژ بێهنا گولان بۆ ئەوێ دهات، هیڤیێن ئەوێ گەشبوون دگەل گەشبوونا گولێن د ناخێ ئەوێ دا هاتینە چاندن!
ڕۆژ دناڤ تارییێ دا بەرزەبوو، تاری چوو د هەمبێزا هەیڤێ دا و دۆرماندۆرێن ئەوێ بوونە تژی گول، دلۆپ دلۆپ ڕۆندکێن کویفخوەشییێ ب چاڤێن ژیندایێ دا دهاتنە خوارێ، دبێژیتە گولێن خوە: ژ گولەکا بێ باخچەڤان بوومە باخچەڤانەک و پاشی بوومە وێنەکێشەکا سەرکەفتی، من هوین د باخچەیێ ناخێ خوەدا چاندن، داکو ببم ئەو گولا مەزنا چەقێن ئەوێ د ڤەداینە هەروەکو ئاسمانی هەمبێز دکەن، ڕەهێن ئەوێ د ناخێ دا چووینە خوارێ و سیبەرەکا هەی هەمی گول ل ژێر سیبەرا ئەوێ گولێ دپاراستینە.
