هەموو تەخێن جڤاکی تووشی خەمۆکییێ دبن
زاخۆ، دلۆڤان هالۆ:
چارەسەرکارەکێ دەروونی د دیدارەکێ دا بۆ ڕۆژناما ئەڤرۆ دیار کر کو خەموکی تێکچوونەکا تۆند یا هزر و هەست و ڕەفتارێن مرۆڤییە و گۆت: خەموکی دهێت وەکو نەخۆشیەکا سەربەخۆ یان وەکو نیشان بۆ نەخۆشیەکا مەزنتر.
بەهدین کنجی ئامێدی، ئەو چارەسەرکارێ دەروونیە دیار کر، ژ ئەگەرێن سەرەکی یێن تووشبوونا مروڤی ب نەخوشیا خەمووکیێ ئەوە کو هندەك جاران ڕەوشێن نەخۆش ب سەر مرۆڤی دا دهێن و ئەڤ ڕەوشە هەروەکو خۆ دمینن و ناهێنە گۆهۆڕین، وەکو ئالۆدەبوونێ ب کەسەکێ یان تشتەکی، یان ژی دروستبونا ئاریشەیەکا مێشکی ل دەف وی کەسی یان تووشبوون ب ڕوودانەکێ.
بەهدین ئامێدی دیار کر کو هەبوونا توندوتیژیێ د خێزانێ دا، یان ژی ژێکڤەبوون و بەردان و هەژاری، ئەڤ خالە هەموو دبنە ئەگەرێ دوو دلی و فشارەکا بەردەوام و گۆت: لەوما هەکە گرنگی ب ڤی کەسی و ڕەوشا وی نەهێته دان یان وی کەسی بخۆ بزاڤ نەکرن کو ڕەوشا خۆ بگۆهۆڕیت، دێ هندەك گۆهۆڕین د مێشکێ ڤی کەسی دا چێبن و دێ تێکچوونا هزر و بیران ل دەف پەیدا بیت و ئەڤ کەسە دێ تووشی نەخۆشیا خەمووکیێ بیت.
بەهدین کنجی گۆتژی: هەموو تەمەنێن مروڤان و هەموو تەخێن جڤاکی تووشی نەخۆشیا خەموکیێ دبن، فەقیر و زەنگین و کەسێن ساده و بناڤ و دەنگ.
چارەسەرکارێ دەروونی دازانین کو نیشانێن خەمووکیێ بڤی ڕەنگی دیار دبن وەکو خەم و عاجزیەکا بەردەوام و ئەڤ کەسە هەردەم یێ ڕەشبین و نە ئارامە، هەروەسان ژ دەستدانا گرنگیێ بۆ تشتان کو ئێدی ئەڤ کەسە گرنگیێ نادەتە سەروبەرێ خۆ و لگەل هەڤالان نا دەرکەڤیت، ئانکو کەسەکێ نە چالاکە و گێولێ چ تشتان نامینیت و گۆت: لەوما ڤەکۆلینێن دەروونناسی دیار دکەن کو هەکە دەمەکێ درێژ پتر ژ دوو حەفتیان یان سێ هەیڤان و پتر ل سەر ڤان نیشانان دەربازبوون ئەڤە ئاماژەنە کو ئەڤ کەسە یێ تووشی نەخۆشیا خەمووکیێ بووی.
بەهدین د بەردەوامیا ئاخفتنێن خۆدا گۆت: چارەسەریا ڤێ نەخۆشیێ ئەوە کو ل دەستپێکێ نەخۆش دانپێدانێ ب تووشبوونا خۆ ب ڤێ نەخۆشیێ بکەت، هەروەسا ئەو بخۆ هاریکارییا خۆ بکەت و بازنێ پەیوەندیێن خۆ یێن جڤاکی بەرفرەهـ و بهێزتر بکەت و باوەری بخۆ هەبیت، پاشان سەرەدانا نۆژدار و چارەسەرکارێن دەروونی بکەت داکو ب زووترین دەم چارەسەرییا وی بهێتە کرن.
