هەموو دەرگەهێن كاری و دامەزراندنێ ل بەرامبەر كورتە بالایان دائێخستینە
بێوار حەمدی
كورتە باڵا وەكو هەمی كەسان پێتڤی ب كاری نە و گەنجێن وان ژی حەزدكەن خۆ پێش بێخن و گەلەك ژ وان خودان باوەرنامەنە، بەلێ كار ب دەست ناكەڤیت. سەروكا ئەنجومەنی ژی دبێژیت: (ئەڤە ژ ساڵا 2013وەرە ئەندامێن مە چ موچەیەك نینە، گەنجێن مە گەلەك پێدڤی ب هاریكاریێ نە و حەزدكەن داخوازیێن وان بهێنە بجهئینان).
نەسیبا یاسین، سەروكا ئەنجومەنێ كورتە بالایان، د دیدارەكێ دا بۆ رۆژناما ئەڤرۆ دیار كر، مە 252 ئەندامێن كورتە باڵا ب شێوەیەكێ گشتی هەنە، نێزیكی 110 ژ وان گەنجن ژ هەردوو رەگەزان، ژ وان گەنجان ژی نێزیكی 50 ژ وان دخواندەڤانن و ئەو ژی وەكو هەمی قوتابیان دەرچوویێن پەیمانگەه و زانكۆیێ نە، پتریا وان حەزدكەن كاربكەن ل فەرمانگەهێن میری، لێ ب مخابنی ڤە دامەزراندن نینە و ئەو ژی ل ماڵ د ڕوونشتی نە، ژ بەر كو وان شیانێن ماددی نینن و نەشێن ل كەرتێ تایبەت ژی كاربكەن، ئەڤە ژ سالا 2013ێ وەرە ئەندامێن مە چ موچەیەك نینە و ب تنێ هندەك ژ وان 150 هزاران وەردگرن.
نەسیبایێ ئەو چەندە ژی ئاشكراكر، گەنجێن مە یێن كورتەبالا گەلەك داخوازی هەنە و بۆ وان نەهاتینە بجهئینان، وەكی گەلەك ژ وان حەز یا هەی بچنە گەریانەكێ كو هەمی پێكڤە وەكی كورتە بالا و ئەو ب تنێ بن، بەلێ وان پارێ پێدڤی بۆ گەریانێ نینە، دیسان حەزدكەن كاربكەن، بەلێ دەلیڤێن كاری ژی بۆ وان گەلەك دكێمن، و وان دڤێت بهێنە كومەڵا كورتە باڵایان خزمەتێ بكەن، لێ ب مخابنی ڤە ئەم ب تنێ ڕوژەكێ دەوامێ دكەین و مە چ نەسریا وەسا نینە بشێین خزمەتا وان بكەین.
سەروكا ئەنجومەنێ كورتە بالایان گوت ژی، ب تایبەت گەنجێن مە یێن كوتە بالا ژ هندەك تشتان شەرم دكەن دناڤ جڤاكی دا، وەكی ئەو د ئارام نینن ل دەڤ كەسێن بیانی بن، بەلكو حەزدكەن هەر دگەل كورتە باڵایان بن و هوسا پتر هەست ب ئارامیێ دكەن، بەلی تشتێ گەلەك جوان ل دەڤ وان ئەوە كو ئەو گەلەك د ئێكدوو دگەهن و ئەگەر كەسەك بكەڤیت یان یێ كێم ئەندام بیت یێ دی دەستێ وی دگریت و گۆت: كورتە بالا و ب تایبەت یێن گەنج گەلەك حەز ژ كرنا داواتێ دكەن و ب تایبەت هونەرمەند رومی هەركی كو گەلەك پێ دداغبارن و گەلەك حەزدكەن ئاهەنگا بكەن و ئەو دناڤدا یێ حازربیت.
نەسیبایێ د بەردەوامیا ئاخفتنا خودا دیاركر، مە گەلەك پلان و پڕوژە ژ بۆ گەنجێن خوە هەنە، بەلێ ئاریشەیا مە هەمی دارایی یە، ئەگەر مە داهاتەك هەبا ل هەر حەفتیێ رۆژەكێ دا ئەم شێین كارەكێ مەزن كەین، ئەڤجا چ ژ بۆ گەنجا یان كەسێن نەخۆش یان ژی بۆ وان یێن دڤێن ژ ماڵ ب دەركەڤن و بچنە گەریانا و گۆت: (حوكمەت چ نەسریێ نادەتەمە و وەكو پێتڤی چاڤدێریا مە ناهێتە كرن، كەرتێ تایبەت ژی بو مە چ ناكەن، ئەز وەكو نەسیبا ب خۆ دچم دەرگەهێن زەنگینا و پێچێبویان دقوتم و تێلەفونان بۆ دكەم و هەتا من خاستن یا كری ب تنێ دا كو خزمەتەك بو كورتە باڵایان بهێتە كرن یان بهێنە دامەزراندن ل كەرتێ تایبەت).
ل دووماهیا ئاخفتنا خۆژی نەسیبایێ گۆت: داخوازێ ژ حوكمەتێ دكەم دەستێ هاریكاریێ درێژبكەن و نە ب تنێ بۆ كورتە باڵایان، بەلكو بۆ كومەلێن كێم ئەندامان ژی، چونكی ئەو د نوكە دا گەلەك پێدڤی ب هاریكاریێ نە، ب شێوەیەكێ گشتی خەلك هەمی ژ لایێ مەعنەوی یێ هاریكارە دگەل مە دا و رێزێ ل مە دگرن، بەلێ لایەنێ مە یێ دارایی گەلەك یێ لاوازە، گەلەك ژ كورتە بالایا ل ژێر منەتا دەوروبەرێن خۆنە ئەڤجا چ ژن مامە یان ژن بابە یان …هتد و ئەڤ چەندە دێ كارتێكرنەكا مەزن یا دەرونی ل كورتە بالا كەتن و نە ب تنێ وان بەلكو خەلك هەمی یێ تووشی نەخوشیێن دەروونی دبن.
