هەموو دەریێن د ناڤبەرا هەرێمێ و ئیرانێ دا هاتینە ڤەكـرن
هەولێر، قائید میرۆ:
سەرۆكێ ئێكەتیا ئینان و هنارتنكاران ئاشكرا كر، لڤینێن بازرگانی ل سەرانسەری هەرێما كوردستانێ د بەردەوامن و دبێژیت: هەموو دەریێن سنۆری د ناڤبەرا هەرێم و ئیرانێ دا دڤەكرینە و وەكی بەرێ كەلوپەلێن ئیرانێ دگەهنە بازاڕی.
مستەفا عەبدولڕەحمان، سەرۆكێ ئێكەتیا ئینان و هنارتنكاران بۆ رۆژناما ئەڤرۆ دیاركر، سەرەڕای ئالۆزیێن دەڤەرێ، بەلێ لڤینێن بازرگانی ل هەرێما كوردستانێ د بەردەوامن و گۆت: «رۆژانە كەلوپەل ل بازاڕێن جیهانێ دگەهنە هەرێما كوردستانێ و چو ئاریشەیێن ئینانا كەلوپەلان نینن، هندەك بازرگانێن ئیراقێ ژی ژبەر سیستەمێ ئەسیكۆدا، نوكە رێیا خوە گوهۆڕیە و ب رێیا هەرێما كوردستانێ كەلوپەلان بۆ دەڤەرێن ئیراقێ دبەن و دەریێن هەرێمێ بكار دئینن».
مستەفا عەبدولڕەحمان گۆت ژی: «ل دەستپێكا شەڕێ ئیرانێ دەریێن هەرێما كوردستانێ ل گەل ئیرانێ هاتبوونە گرتن، بەلێ نوكە هەموو دەریێن سنۆری د ناڤبەرا هەرێم و ئیرانێ دوبارە هاتینە ڤەكرن و لڤینێن بازرگانی د ناڤبەرا هەرێم و ئیرانێ دا بەردەوامن و رۆژانە بازرگان كەلوپەلان ل ئیرانێ دئیننە بازاڕێن هەرێما كوردستانێ».
