هەمی جۆرێن قومارا سیستەمی ل دهۆكێ دێ هێنە راگرتن
قومارا سیستەمی، كو ب رێیا وێ رۆژانە ب هزاران دۆلارێن خەلكێ پارێزگەها دهۆكێ دچنە دەرڤەی كوردستانێ، ب ئێكجاری دێ هێتە راگرتن.
ل گۆرەی زانیاریان لایەنێن پەیوەندیدارێن پارێزگەها دهۆكێ، دووڤچوونا هەمی جۆرێن قومارا سیستەمی دكەن و وان كەس و جهێن ب ڤێ تاوانێ سووچبار دەستنیشان دكەن و د قووناغا دویێ دا دێ هەمی جۆرێن وێ قومارێ ل پارێزگەها دهۆكێ هێنە راگرتن.
گاڤ بەلاڤكریە پشتی نەهێلانا دۆمبەلێ، گڤاشتنێن پتر چێبووینە و چەندین كۆمبوون د ناڤبەرا پارێزگەها دهۆكێ و لایەنێن ئەمنی دا هاتینە كرن، بۆ وێ یەكێ دەست ب سەر وان هەمی جهێن قومارا سیستەمی و بەرنامەیێن وێ دا بهێتە گرتن و هەمی ئەو كەسێن سووچبار ب ڤێ تاوانێ، بهێنە دەستەسەركرن.
د. عەلی تەتەر، پارێزگارێ دهۆكێ د ڤێ مەهێ دا راگەهاندبوو، ب چ رەنگان رێ ب هەبوونا جهێن دۆمبەلێ ل پارێزگەها دهۆكێ ناهێتەدان و دێ دووڤچوونا هەمی جۆرێن قومارێ كەن.
ل دووڤ زانیاریان، رۆژانە ب هزاران دۆلارێن خەلكێ دهۆكێ ب رێیا سیستەمێن جودا یێن قومارێ دچنە دەرڤەی وەلاتی.
