هەناسەیێن ناخێ بێدەنگیێ
فەهیما ئیبراهیم
د رۆژەكا بارانی دا مینا ئەڤرۆ، هەر تشت د هەبوونێ دا ب تنێ هەڤدیتنەك كێمە، هەست پێ دكم دەم یێ گونجای یە بۆ دەستپێكەكا نوو، دانپێدانێ دكم، هەستێن من هەردەم خیانەتێ ل من دكەن، جاران وەسا هزردكم چ تشت نینن ب ناڤێ خیانەت، بەلكو د ناخێ مروڤان دا گەلەك گونەهـ د ڤەشارتینە، جاران بێدەنگی هەموو تشتان ئاشكرا دكەت، ژیان هاوكێشەیەكا سەیرە، ب دورستی نەشێی شروڤەكەی، هەموو هیڤیێن من د مەزنییا ڤی گەردونی دا مینا دلۆپەكا ئاڤێ د دەریایەكێ دا دوندا، ل بەندا هیڤییەكا بێ رێ.
بێهیڤیبوونێ هەموو هیڤیێن من د جیهانا بێدەنگیێ دا كەڕ و لال بەلاڤەكرن، تنێ دزانم تشتەك من دكێشتە تە، نزانم چیە بەلكو ئاشۆپەك بت، یان ئومێدەك بت، ب دروستی نزانم چ ناڤ لێ بكم. ب تنێ دزانم دەمێ هزرێن تە دكم، هەست ب ئارامیێ دكم، دهەمان دەم دا دەمێ تو دناڤ هزرێن من دا نە بی، هەست ب بەرزەبوونێ دكم.
ب رامانەكا روهنتر، هەست پێ دكم بێی تە یا لاوازم، یا شكەستیمە، دانپێدانێ دكم، هەردەم ناخێ من خیانەت ل من كرییە، ئەڤ هەموو شكەستن و داكەتنێن من شاهد و دیدەڤانن.
هەموو دەم و چركەیێن دەستداهێلانا من، لاوازیا من، پێنگاڤێن سست، ترسا مانا د چارچوڤەیەكی بەرتەنگ دا، سنوورێن دناڤبەرا من و مرنێ دا نێزیك دكەت. دهاتنا تە دا هەر تشت ب بێدەنگی ڤەدژیت.
دانپێدانێ دكەم، نهو مینا بالندەیەكێ كۆچبەر و ژ هەر تشتەكی رەڤی، ل بەندا حەواندنەكێ مە، ل بەندا هەمبێزەكێ مە، ئەزا ژ خوە و هەر تشتەكی رەڤیم، بەرەف تە هاتیم، ب هەمبێزەكا تەمەت دەریایەكێ مەزن من هەمبێزكە.
دانپێدانێ دكەم، ئەزا دناڤ خەونێن خودا بەرزەبوویم، من وێرەكی نینە چ پێنگاڤا پاڤێژم، یا بوویمە ئالۆدەیا ترسێ، كەسەكا هاڤی ، ب هزارەها رێ مینا تەڤنێ تەڤنپیركێ ئالۆز دكەڤنە بەر چاڤێن من. هیڤیێن من نە ب زەحمەت بوون، نە تشتەك ئەفسانە ژی بوون، ب تنێ چەند هیڤیەك بوون ب تبلێن دەستان دهاتنە هەژمارتن، هیڤیێن سادە بوون، مینا خەونێن زاڕۆیان بوون. هیڤیا من یا ژ هەموویان مەزنتر هەبوونا تە بوو. هەبوونەكا راستەقینە، بۆ نموونە، نە بتنێ تو ب جەستەیێ خوە دگەل من بی، بەلكو ب هزر و هەناسەیێن خوە، بێهنا تە ناخێ من داگیركەت، رحا تە تێكەلی رحا من بت. نهو وەرە بۆ من بەحسێ وان هەموو ئەگەران بكە یێن دووراتی پەیدا كرین، بۆ من شرۆڤەك ، هەر وەكو جیهان ژ مرۆڤان یا ڤالا دبت، ئەڤ جیهانا هاوارا خوە دگەهینمێ یا كەڕ دبت، لەو چ بەرسڤ بۆ پرسێن من نینن.
من فێری تنێبوونێ بكە، دەمێ د پەنجەرەیێ دا ل ئەسمانی دنێرم، تاریاتیێ نابینم، ب تنێ رۆناهییا ستێرا دبینم، هزردكم تو ئەو كەسێ دوور یێ نێزیك، وەرە ب چاڤێن خوە شوونتبلێن خوە د كەنی و گری و هەناسەیێن من دا ببینە.
دانپێدانێ دكەم، بیرهاتنێن تە تژی ناخێ منن.
گازیێن من یێن بێ ناڤونیشان دگەل وان هەموو پەیڤێن من دارێژتینە سەر ڤێ لاپەری، دبت دەربرینێن من خیانەت ل من كربت، ب دروستی نەشیابن هەستێن من بگەهینن، تو یێ دوور، یێ نێزیك، د سنووریێن هەناسەیێن من دا، هەكەر دووراتی ئاوازەك با، دا هەموو پەیڤان بۆ نێزیكبوونا تە كەمە ستران.
