هەوارێن لال
دلدار محەمەد
(1)
بارێ ژیانێ
پێنجی سالن ئەو ل بازاری؛ بارێن گران ژ ڤێرێ بۆ وێرا هەنێ هەلدگریت، ئەڤرۆ ب چاڤێن رۆندك ڤە دڤیا ببێژیت: من نە دیتی یە، بارەك ژ هەژاریێ گرانتر هەبیت.
(2)
تە دڤێت ببیە چ؟
وێ ئێڤارێ پشتی ژ پالەتیێ زڤری پایسكل بازاركرن ، بهایێ وی سێ جاران هندی رۆژانەیا وی بوو، رۆندكێن زاروكێ وی یێن بۆ نەبوونا پایسكلێ د بارین ژ بەرچاڤا نە دچوون، ئاخینكەك هەلكێشا و ددلێ خودا گوت :
مامۆستا ئەگەر من تو دیتبایەڤە دا دەربارەی پرسیارا تە(تەدڤێت ببیە چ ) بێژم
ئەز ژ هیڤیا مامۆستاییێ لێڤەبووم ، من دڤێت بۆ زاروكەكی ببمە پایسكل.
(3)
مینا دەستڤالاتیێ
ل رێكەكا رەڤێ دگەریا و دگەل خۆ دگۆت: من چ منەت ب رێڤەچوونا دناڤ زەڤیێن مینان دا نینە، ژمێژەیە ژیان دەربازكرنا ب دەستڤالاتی ب من ڤە پەقی.
(4)
ژانە ژین
سالێن ژیێ خۆ د هژمارتن، نیڤەكا سالان بۆ كوچباریێ بوون، چاڤێن وی ژ رۆندكان پەنگیان : ژیان، تو دزانی پیتا دووێ ژناڤێ تە یا زێدەیە؟!
