هەوا ڤاكسیندانێ بۆ زارۆیان ل پارێزگەها دهۆكێ دەستپێكر
دهۆك، لەزگین جوقی:
هەوا ڤاكسیندانا زارۆیێن ڤەقەتیای ل سەرانسەری پارێزگەها دهۆكێ دەستپێكر، ئەڤ هەوا ڤاكسینێ بۆ دەمێ 10 رۆژان دێ یا بەردەوام بیت و ساخلەمیا دهۆكێ دخوازیت هەموو زارۆكێن ڤەقەتیای ڤاكسینێ وەربگرن.
د. فەرهاد ئیسماعیل، رێڤەبەرێ كاروبارێن خوەپاراستنا ساخلەمیا پارێزگەها دهۆكێ دیار كر، هەموو زارۆكێن ژییێ وان ژ پێنج سالیێ كێمتر، ل دووڤ خشتێ ڤاكسیندانێ یێ زارۆكان دێ هێنە ڤاكسیندان و گۆت: «ئەم داخوازێ ژ دایك و بابان دكەین ڤاكسینێ بۆ زارۆیێن خوە یێن ڤەقەتیای وەربگرن».
د. بلند ژ رێكخراوا ساخلەمیا جیهانی دیار كر، هندەك زارۆك هەنە، نەچووینە بنگەهێن ساخلەمیێ بۆ وەرگرتنا ڤاكسینێ و گۆت: «ل هەموو دەڤەران رێژەیا وەرگرتنا ڤاكسیندانێ ب تایبەتی ژی ڤاكسینا سۆركێ كێمبوویە، لێ ل پارێزگەها دهۆكێ ئەڤ رێژە ژ پارێزگەهێن دی یێن ئیراقێ و هەرێما كوردستانێ باشتربوویە مە، ژ بەرهندێ مە وەكو رێكخراوا ساخلەمیا جیهانی و ساخلەمیا دهۆكێ دەست ب ئەنجامدانا هەوەكا ڤاكسیندانێ كر بۆ كونترۆلكرنا نەخۆشیا سۆركان، ئەڤ هەوە بۆ دەمێ 10 رۆژان دێ یا بەردەوام بیت، چەندین تیمێن گەرۆك ژی هاتینە پێكئینان و دێ ل هەموو جه و دەڤەران گەڕن».
