هەولێرێ ڤێجارێ ژی بەهانەیێن بەغدا بۆ نە هنارتنا مووچەی نەهێلان
شارەزایەكێ وارێ پەترۆلێ ئاماژە ب وێ چەندێ كر كو پشتی رێككەفتنا د ناڤبەرا هەردو حوكمەتێن هەرێما كوردستانێ و حوكمەتا فیدرالییا ئیراقێدا، ئێدی كەس نەشێت ئەگەرێ دەست پێ نەكرنا هنارتنا پەترۆلێ بێخیتە ستوویێ هەرێما كوردستانێ و جارەكادی بەهانەیێن نەهنارتنا مووچەی هاتنە بڕین.
بەرهەم گەردی، شارەزایێ وارێ پەترۆلێ گوت» رێككەفتنا د ناڤبەرا هەردو وەزارەتێن پەترۆلا ئیراقێ و سامانێن سروشتی ل هەرێما كوردستانێ، رێككەفتنەكا گشتگیرییا سێ ئالییانەیە كو كۆمپانیێن بەرهەمئینانا پەترۆلێ ل هەرێما كوردستانێ د رازینە ب ڤێ رێككەفتنێ بۆ دەمەكی و بزاڤەكە ژی بۆ دەستپێكرنا هنارتنا پەترۆلا هەرێما كوردستانێ بۆ بەندەرێ جەیهان ل توركیا، ئەڤ بزاڤە پشتی زنجیرەیەكا دانوستاندنێن راستەوخوە و نەراستەوخوە د ناڤبەرا هەر ئالییان دهێت».
ئەوژی بەرچاڤكر: یا رۆهنە هەرێما كوردستانێ رۆژانە 50 هزار بەرمیلان بۆ پێدڤیێن ناڤخوەیی بكاردئینیت، ئەو رێژەیا پەترۆلێ ژی ل دووڤ رەوشا زەڤیێن پەترۆلی دمینیت، نوكە نێزیكی 130 هزار بەرمیلایە و دهێنە هنارتن بۆ بەندەرێ جەیهان ل توركیا، لژنەیەكا تەكنیكی و هەڤپشكی ژی د ناڤبەرا وەزارەتا پەترۆلا ئیراقێ (كۆمپانییا پەترۆلا باكوور) و وەزارەتا سامانێن سروشتی ل هەرێما كوردستانێ دێ هێتە پێكئینان و هەموو دو حەفتییان جارەكێ دێ راپۆرتەكێ ل سەر زێدەبوونا بەرهەمئینانا پەترۆلێ و رەوشا زەڤیێن پەترۆلێ بەرهەڤ كەن».
وی شارەزایێ وارێ پەترۆلێ دوپاتكر ژی كو ڤێجارێ ژی بەهانەیێن بەغدایێ بۆ نە هنارتنا مووچەی هاتە بڕین، ئێدی كەس نەشێت ئەگەرێ نە هنارتنا پەترۆلا هەرێما كوردستانێ بێخیتە ستوویێ هەرێمێ، ئێدی هەكە بەغدا بەهانەیێن دی نەئینیت و ئەڤێجارێ تشتەكێ دی نەكەتە بەهانە، دڤێت مەهانە ب رێكوپێكی مووچەیێ فەرمانبەرێن هەرێما كوردستانێ بهنێریت، هەرچەندە هیچ تشتەك ل گەل دەستهەلاتدارێن بەغدایێ جهێ پشتڕاستبوونێ نینە».
