هەولێر پێشەنگە و دهۆك و زاخۆ ڕێزبەندیێن خوە ژ دەستدان
قەیس وەیس:
ب دووماهی هاتنا یاریێن گەڕا شەشێ ژ هەڤڕكیێن خولا ستێرێن ئیراقێ یا فوتبۆلێ، یانەیا هەولێر شیا ڕێزبەندییا خوە ل سەرێ لیستێ پارێزیت د بەرانبەر دا یانەیێن كوردستانی، دهۆك، زاخۆ و نەورۆز ڕێزێن خوە یێن گەڕا پێنجێ بۆ گەڕا شەشێ ژ دەستدان و پاشڤە چوون.
دهۆكێ مفا ژ ئەرد و جەماوەرێ خوە وەرنەگرت
تیما دهۆكێ نەشیا سەركەڤتنێ ل سەر مێڤانا خوە یانەیا نەفت یا بەغدایی بینت ئەوا یارییا وان بێ گۆل ب دووماهی هاتی، د یارییا واندا ئەوا ل یاریگەها یانەیا دهۆكێ وبەرهەڤبوونا هژمارەكا ئێكجار زوور یا پشتەڤانێن وێ، بڤێ ئەنجامێ تیما دهۆكێ ژ شەش یارییان چار خوسارەتی، سەركەڤتنەك و وەكهەڤییەك ئینایە ب كۆمكرنا چار خالان ژ ڕێزا 15ێ پاشڤەچوو ڕێزا 16ێ.
زاخۆ ب خالەكێ ڤەگەڕیا
تیما یانەیا زاخۆ ب خالەكێ ژ یاریگەها ناسرییە ڤەگەڕیا پشتی بێ گۆل دگەل خودانێن ئەردی ئەلغراف وەكهەڤبوویی، كوڕێن خابووری ئەوێن بەرهەڤییان بۆ یارییا سێیێ ژ كۆپا كەنداڤی دكەن كەڤتینە لبن گڤاشتنێن دو خولان دا، بڤێ ئەنجامێ خالێن خوە گەهاندنە 10 خالان ژ سێ سەركەڤتن، وەكهەڤی و دو خوسارەتییان لێ ژ ڕێزا حەفتێ پاشڤەچوو ڕێزا نەهێ.
هەولێرێ سەرێ لیستێ پاراست
تیما یانەیا هەولێرێ بەردەوامە ل سەر پاراستنا سەرێ لیستێ و ئەنجامێن باش پشتی سەركەڤتنا پێنجێ د خولێ دا ئینایی ب سەركەڤتی ل سەر یانەیا نەورۆز ب گۆلەكێ بێ بەرانبەر، ئەڤ ئەنجامە بوو پالدەر سەرێ لیستێ بپارێزیت و 16 خالان كۆمبكەت ژ پێنج سەركەڤتن و وەكهەڤییەك هەیی و هیچ خوسارەتیەك نە ئینایە.
ژ ئەنجامێن یاریێن دی
شورتە 1-چنە ئەلگەرمە، ئەمانەت بەغدا چنە-1 نەجەف، جەوییە 2-1 دیالا، مینا 2-چنە ئەلقاسم، تەلەبە 2-1 نەفت میسان، مووسل 1-3 زەورا، كەرخ 1-1 كارەبا.
هەلوەستێ گشتی پشتی ب دووماهی هاتنا گەڕا شەشێ
1- هەولێر 16 خال.
2- دیالا 13 خال.
3- جەوییە 13 خال.
4- شورتە 12 خال كێمترییا یارییەكێ.
5- ئەلغراف 12 خال.
6- كەرخ 11 خال.
7- تەلەبە 11 خال.
8- ئەلگەرمە 10 خال.
9- زاخۆ 10 خال.
10- مینا 10 خال.
11- نەفت نەهـ خال.
12- زەورا هەشت خال كێمترییا یارییەكێ.
13- نەجەف شەش خال.
14- مووسل شەش خال.
15- بەغدا شەش خال.
16- دهۆك چار خال.
17- نەفت میسان سێ خال.
18- نەورۆز سێ خال.
19- كارەبا دو خال.
20- ئەلقاسم ئێك خال.
خول دێ هێتە ڕاوەستاندن و ئەڤرۆ پشككێشانە
فدراسیۆنا فوتبۆلا ئیراقێ ڕاگەهاند كو یاریێن گەڕا حەفتێ ئەوا بڕیاربوو سوبەهی هاتبا كرن لێ هاتنە پاشئێخستن ژبەر پشكدارییا هەلبژارتیێ ئیراقێ د ڤاڤارتنێن ئێكلاكەر بۆ قۆناغا دووماهیێ یا پاشكۆ دەربازبوون بۆ مۆندیالا جیهانی 2026ێ، ئەوا بڕیارە دو یاریێن ڤەبر هاتن و چوون دگەل هەلبژارتیێ ئیماراتێ بكەت ل 13ێ و18ێ ڤێ مەهێ بكەن، ژلایەكێ دووڤە فدراسیۆنێ ڕاگەهاند ئەڤرۆ دێ پشككێشان بۆ قۆناغا دویێ ژ كۆپا ئیراقێ هێتە كرن، ئەوا دێ 20 یانە هەڤڕكیی بۆ 10 پلێتێن دەربازبوون بۆ قۆناغا دویێ كەن.
