هەوەكا بەرفرەها هشیارکرنێ ل دۆر تایا خوینبەربوونێ ل دهۆكی هاتە ئەنجامدان
دهۆك، لەزگین جوقی:
بەرپرسێ پشكا ئێشێن نەڤەگر ل رێڤەبەریا كاروبارێن خوەپاراستنا ساخلەمیا پارێزگەها دهۆكێ دیار كر، ژ بەر نەخۆشیا تایا خوینبەربوونێ دوهی 11/6/2023ێ ل پارێزگەها دهۆكێ دەست ب هەوەكا بەرفرەه یا هشیاركرنا گوشتفرۆشان هاتە كرن.
د. سەكڤان حەسەن، بەرپرسێ پشكا ئێشین نەڤەگر ل رێڤەبەریا كاروبارێن خوەپاراستنا ساخلەمیا پارێزگەها دهۆكێ بۆ ئەڤرۆ خویا كر، چار تیم هاتینە پێكئینان بۆ هشیاركرنا وەلاتیان، ب تایبەتی ژی كەسێن كارێ گوشتفرۆشیێ د ناڤ بازارێن گوشتفرۆشان دا دكەن، ل دۆر چاوانیا خوەپاراستنێ ژ نەخۆشیا تایا خوینبەربوونێ و گۆت: «ئەڤ هەوە دێ یا بەردەوام بیت، هەموو پێدڤیێن خوەپاراستنێ، وەكو: دەزگورك و رێنمایێن تایبەت ب خوەپاراستنێ ژ نەخۆشیا تایا خوینبەربوونێ، دیسا شیرەت ل وان هاتنە كرن، دەمێ هەر نیشانەكا تایێ ل نك وان پەیدا ببیت، ئێكسەر قەستا دەزگەهێن ساخلەمیێ بكەن بۆ پشتڕاستبوونێ و وەرگرتنا چارەسەریێ.
ناڤهاتی گۆتژی: «هەتا نوكە ل پارێزگەها دهۆكێ چو حالەتێن تایا خوینبەربوونێ د ناڤ نەخۆشخانەیان دا نینن، كەسەكێ خەلكێ باشیكێ یا سەر ب پارێزگەها نەینەوا ڤە ژ ئەگەرێ هەبوونا گومانێن تایا خوینبەربوونێ گیانی خوە ژ دەست دا».
