هەژمارەكا زۆر یا جادەیان ل دێرەلۆكێ دهێنە بجهئینان
ئامێدیێ، مەحمود نهێلی:
د بەردوامیا گەهاندنا پڕۆژەیێن خزمەتگوزاری دا بۆ دەڤەرێ و خزمەتكرنا وەلاتیان، پڕۆژەیێ چێكرنا هەژمارەكا جادەیێن ناڤخۆیی ل سۆرێ باژێرڤانیا دێرەلۆكێ دهێتە بجهئینان و گوژمێ پتر ژ ئێك ملیار دیناران بۆ هاتیە تەرخانكرن.
رێبەر سادق، رێڤەبەرێ ناوچەدارییا دێرەلۆكێ بۆ رۆژناما ئەڤرۆ دیار كر، ل سەر دەمێ كابینەیا نەهێ یا حكومەتا هەرێما كوردستانێ رازیبوون ل سەر چێكرنا هەژمارەكا زۆرا پڕۆژەیان ل سنۆرێ دەڤەرا وان هاتیە كرن و گۆت: «ژ وان پڕۆژەیان ژی: چێكرنا جادەیێن نافخۆیی یە ل سنۆرێ ناوچەدارییان دێرەلۆكێ، هەژمارەكا زۆرا جادەیان هاتینە چێكرن و هەژمارەك ژی ل ژێر بجهئینانێ نە».
گۆتژی: «گوژمێ ئێك ملیار و 150 ملیۆن دیناران بۆ ئەنجامدانا ڤی پڕۆژەی هاتینە تەرخانكرن و نوكە پڕۆژە ب رێژەیا 60% هاتیە بجهئینان و د دەمەكێ نێزیك دا دێ پڕۆژە ب داوی هێت و كەڤیتە د خزمەتا خەلكێ ڤێ ناوچەیێ دا».
